Dadgeha Federal a Iraqê, di derbarê giliya Yekîtiya Niştîmaniya Kurdistanê (YNK) û Nifşê Nû ya li dijî rûniştina yekem a Parlamentoya Herêma Kurdistanê de biryar da.
Li gorî biryara Dadgehê, tenê fermana demkî (welayî) hatiye betalkirin ku ev jî tê wê wateyê gilî wekî xwe maye, lê parlamento dikare li ser karên xwe berdewam be.
Ango dadgehê doz an jî giliya ku hatiye tomarkirin red nekiriye û negirtiye, lê ew doz hîn li ber destê dadgehê vekiriye û lêkolîna li ser berdewame.
Roja 10’ê Mijdarê li dijî encamdana civîna yekem a temamkar a Parlamentoya Herêma Kurdistanê ku Partiya Demokrat a Kurdistanê bi awayekî yekalî encam da û desteya serokatiyê hat hilbijartin, partiyên YNK û Nifşê Nû li Dadgeha Bilind a Federal gilî tomar kirin.
Di giliya ku li Dadgeha Bilind a Federal a Iraqê hatiye tomarkirin de, hatiye xwestin ku civîna 4’ê Mijdarê û hemû rêkarên wê yên wekî hilbijartina desteya serokatiya parlamentoyê bên betalkirin û ew wekî neyasayî û li derveyî protokola parlamentoyê bi nav kirine.
Her di heman giliyê de ji dadgehê hatiye xwestin ku fermaneke demkî (welayî) derxîne, da ku parlamento hemû karên xwe bi awayekî demkî rawestîne heta ku dosye yekalî dibe û dadgeh biryara dawî bide.
Betalkirina fermana demkî tê wateya ku dadgehê ew biryara demkî betal kiriye. Ango ew sazî û dezgeha ku gilî li ser hatiye tomarkirin, dikare bi awayekî demkî li ser pêkanîna karên xwe berdewam be heta roja dadgehkirina bingehîn.
