Li gelek bajarên li seranserê Kurdistan û Tirkiyeyê, jin di çarçoveya 25’ê Mijdarê de, li hev civiyan da ku daxwazên xwe yên hevpar ên li dijî şîdetê diyar bikin.
ÎZMÎR
Komîsyona Jinan a Komeleya Mafên Mirovan (ÎHD) li otêlekê li Îzmîrê civîneke çapemeniyê li dar xist. Di civînê de, ku dirûşmeya “Jin, jiyan, azadî” hate berzkirin, daxuyaniya çapemeniyê ji aliyê Sekretera Navendî ya Komîsyona Jinan a ÎHD’ê Handan Coşkun ve li ser navê jinan hate xwendin.
AMED
Koma Xebata Jinan a Komîteya Koordînasyona TMMOB’ê ya Amedê li ber Navenda AVM a Ceylan a navçeya Peyasê bi dirûşmeya “Em endezyar, mîmar û plansazên bajarî ne; em ê bajarekî hevgirtinê ava bikin, ne yê tundûtûjiyê” çalakî li dar xist. Di dema xwepêşandanê de wêneyên jinên kuştî hatin hilgirtin. Piştî xwepêşandanê, Berdevka Koma Xebatê Filiz Kaçar diyar kir ku tundûtûjiya li dijî jinan ne tenê bi bûyerên yekane ve sînordar e û got, “Em diyar dikin ku tundûtûjiya li dijî jinan ne tenê tundûtûjiya fîzîkî ye, lê di heman demê de tundûtûjiya aborî, tundûtûjiya psîkolojîk, mobbîng, tacîz, cudakarî û nedîtîkirina keda jinan jî cureyên cûda yên tundûtûjiyê ne.”
Daxuyanî bi dirûşmeyan bi dawî bû.
ANTALYA
Li navçeya Kepezê ya Antalyayê, li saloneke dawetê bi dirûşmeya “Soza me ji bo jiyaneke azad û wekhev heye, em li dijî tundiyê serî hildidin” forumek hate lidarxistin. Berdevka Meclîsa Jinan a Partiya Wekhevî û Demokrasiyê ya Gelan (DEM Partî) Halide Turkoglu, ku beşdarî forumê bû, bal kişand ser girîngiya rêxistinbûna jinan.
WAN
Li Wanê, di çarçoveya 25’ê Mijdarê de, Komeleya Hiqûqnasên Azadiyê (OHD), Navenda Mafên Jinan a Baroya Wanê, Komeleya Mafên Mirovan û Medyayê (ÎHAMED) û Komeleya Jinên Star li Baroya Wanê civîneke çapemeniyê li dar xistin. Aktîvîstên Tevgera Jinên Azad (TJA), endamên komeleyan jî beşdarî civîna çapemeniyê bûn.

