Ahmet Turk di axaftina xwe ya li konferansa “Di sedsala Duyemîn de Veguherîna Demokratîk a Komarê’ ya li Stenbolê de, diyar kir ku tevgera siyasî ya Kurd bi salan e parastina siyaseta demokratîk û aştiyê dike.
Turk, di panela bi sernavê “Siyaseta Demokratîk û Hêza Civakê: Ji Herêmê ber bi Komara Demokratîk ve” de, destnîşan kir ku ji dema HEP’ê ve, wan ji bo yekbûna gelên Kurd û Tirk li ser bingeha nirxên demokratîk xebat dimeşînin. Turk, diyar kir ku tevî girtina partiyan, kuştinên bê daraz û zextên siyasî jî, wan dev ji siyaseta demokratîk bernedaye.
Ahmet Turk bi bîr xist ku di sala 1993’yan de berî ku biçe Şamê û hevdîtinê bi Rêber Apo re bike li gel serokkomarê wê demê Turgut Ozel hevdîtin kiriye. Turk, got ku Ozal ji wan re gotibû ku rêbazên çekdarî çareserî nînin û divê siyaseta demokratîk û lihevhatin were pêşxistin.
Ahmet Turk di derbarê pêvajoya niha de jî axivî û got ku piştî banga Rêber Apo ya 27’ê Sibatê gelek hevdîtin hatine kirin, lê raya giştî hîn jî nexşerêyek zelal nabîne. Turk, anî ziman ku tevî vê tevgera siyasî ya Kurd hêviya aştiyê diparêze û got ku lê di nava civakê de hestek bêbaweriyê jî her ku diçe zêde dibe.
Li ser pirsa “Pirsgirêka Kurd çi ye?” Ahmet Turk li ser jiyana xwe nimûne da û got, “YSK’ê sê caran got ku li pêşiya namzetbûna min tu astengî tune ye. Ez sê caran bûm namzetê Şaredariya Başarê Mezin a Mêrdînê, lê li şûna min qeyûm hat tayînkirin. Dibêjin Kurd çi dixwazin. Ez ji xwe nimûne didim. Ez ji malbatekî mezin im ku li Kurdistanê xwedî erdeke berfireh e. Lê nasnameya min tune ye. Zimanê min tune ye. Gelê min tê înkarkirin. Ji ber vê pirsgirêka Kurd ez im.”
Turk got ku di tevahiya jiyana xwe de siyaseta yekîtî û bihev re jiyanê parastine û got ku wan her dem xwişk-biratiya gelan û çareseriya demokratîk esas girtine.
Turk di dawiyê de got, “Me dev ji siyaseta demokratîk berneda. Me bawer kir ku pirsgirêk bi siyaseta demokratîk tên çareserkirin. Em naxwazin vê baweriyê winda bikin. Ez bang li hemû aktorên ku vê pêvajoyê bi rê ve dibin dikim: Gelê Kurd û gelê Tirk nekin qurban. Aştîxwaz bin, gelan hembêz bikin û projeyên ku siberojê misoger dikin ava bikin.”
