Ji 3 rojan ve, ji ber xelasbûna ard û negihaştina tu beşên din ji ard û sotemeniyê, piraniya firinên taybet ên Siwêdayê rawestîne. Wê yekê krîzek di peydakirina nan de çêkir. Bi vê yekê zehmetiyên ku welatî li gel ambargoya ku ji nîvê Tîrmehê ve dikişînin, zêde dike.
Bi xerabûna firina yekane ya otomatîk a li Siwêdayê re krîza dabînkirina nan zêdetir bû.
Li gorî ANHA’yê ku agahiyên xwe dispêre çavkaniyeke ji gerînendetiya firinan, da zanîn ku firinên taybet ji 3 rojan ve tu mîqdarek ard an jî sotemenî wernegirtine. Tenê beşek ji sotemeniyê hat wergertin û li tevahî firinan hat parvekirin.
Aliyên eleqedar diyar kir ku dê di 48 saetan de bi rêya rêxistinên navneteweyî 2 beşên ard bigihînin Siwêdayê û dê li firinan werin belavkirin. Heta wê demê, tenê firinên giştî dixebitin, lê nikarin hewcedariyên şêniyan dabîn bikin.
Ji destpêka ambargoyê ve ku hêzên hikumeta veguhêz a Sûriyeyê li ser Siwêdayê ferz kiriye, tenê mîqdarên hindik ên ard û mazotê û hin alîkariyên mirovî bi rêya “korîdora mirovî” ya li Busra El Şam digihînin Siwêdayê.
Heyva Sor a Sûriyeyê jî red kir ku karwanê alîkariyê yê Bakur û Rojhilatê Sûriyeyê ya bi 55 ton xurekê derbasî başûrê Sûriyeyê bibe. Heyvê xwest ew wergirin û bi xwe belav bikin. Komeleya Alîkarî û Geşepêdanê ya Mezopotamyayê ew yek red kir û kamyon vegerand Hesekê.
