Li ser rêya navçeya Ranya ya ser bi îdareya Raperîn li nêzî gundê Girdcan bi tevlîbûna rojnamevan, jinan, çalakvan û azadîxwazan Rojnamevan Azîz Koyluoglû û hevrêyên wî li cihê lê hatibûn şehîdkirin bi çalakiyekê ew bibîr anîn.
Di bîranînê de peyama Çapemeniya Azad ya Başûrê Kurdistanê ji aliyê Rojnamevan Baran Germiyan ve hate xwendin.
Peyama Çapemeniya Azad ya Başûrê Kurdistanê wiha ye:
“Îro salek bi ser şehadeta hevrêyê me şehîd Azîz Koyluoglu ku ji aliyê dewleta Tirk ve di 27’ê Çileya 2025’an de şehîd bû re derbaz dibe. Armanca dewleta Tirk ya ji vê êrişê bêdengkirina dengê azad û têkoşîna çapemeniya azad ya ji bo rastî gihandina raya giştî bû. Dewleta Tirk bi hedef girtina şehîd Azîz û hevrêyên wî yên çapemeniya azad, dixwest îradeya azad ya gelê Kurd bike hedef.
Beriya hertiştî ev teror di bingeh de hewldanek ya ji bo tinekirina bîrdoziya azad ya Kurdan bû. Bivan êrişan dixwazin xewn, armancên dîrokî, siyasî, civakî û çandî ku ewil medya di pêşengiya vê têkoşîna bîrdoziyê deye, dikin hedef. Me jî soz daye em bibin dengê heqîqetê.
Ger em li van êrişên dawî yên ser gelê Kurd ji binêrin, ragihandina şerê taybet bi hemû hêza xwe hewl dide îdeolojî û cîhanîbûna tevgera azad ya li ser bingeha jiyana hevbeş ya azadiya gelan, bike hedef û berovajî bike. Di esasê xwe de dijmin di nava du salên borî de êrişek berfireh dijî rojnamevan azad yên li Başûrê Kurdistanê destpê kir. Di encama êrişan de hevrêyên me Gulistan Tara, Hêro Behadîn, Nazim Daştan, Cîhan Bîlgîn û Azîz Koyluoglu bûn hedef.
Di demek ku em îro livir ji bo şehîdan kombûne, li ser gelê Kurd, taybet jî li ser Rojavayê Kurdistanê êrişên hovane tên kirin. Ev êrişane komployek navnetewî ya dijî hebûn, nasname û îradeya azad ya Gelê Kurde. Di heman demê de dijî Rojavayê Kurdistanê ku pêşengtiya parastina nirx, pîvanên gelên bindest ya dijî desthilatdaran dikeye.
Em weke çapemeniya azad ya Başûrê Kurdistanê, tevî bîranîna hevrêyên xwe, soz didin ku emê têkoşîna li ser vê rêya bi ruhê rêwîtiyê, xwedî derketina li nirxên exlaqî û civakî yên gelê Kurd û neteweyên azadîxwaz bidomînin. Emê bibin bersiva hevalên xwe yên şehîd.”
