Cenazeyê Huseyîn Aykol ji Nexweşxaneya Lêkolîn û Perwerdeyê ya Sîncanê hate wergirtin û birin Dika Yilmaz Guney a Şaredariya Çankayayê.
Darbest li salona bîranînê bi qurnefîlên sor hate xemilandin û find hate vêxistin.
Pankarta bi nivîsa “Çinara şoreşger a Çapemeniya Azad em ê te ji bîr nekin. 1956-?” li salona bîranînê hate daliqandin.
Hevserokê Giştî yê DEM Partiyê Tûncer Bakirhan li merasîmê axivî û got, “Hevalên hêja, min jî salên dûr û dirêj hevrê Huseyîn nas dikir. Li Enqereyê dem bi dem em bi hev re demeke dirêj xebitîn. Bi hev re derketin derveyî welat. Beşdarî gelek çalakiyan bûn.”
Bakirhan got, “Min di jiyana xwe de yekî weke wî nedît ku ewqasî dilnizm, dilsozê karê xwe û bi dîsîplîn bû” û bi vî rengî dewam kir: “Em ji wî hînî gelek tiştan bûn. Dilnizmî, tecrûbe hînî me kir.
Huseyîn Aykol di sînevîzyonê de vê dibêje: ‘Ez deyndarê gelê Kurd im’. Bifikirin; 50 salên xwe daye, zêdeyî 10 salan li girtîgehê maye, di demên herî zehmet de, di 40 salên zehmet de, di nava bahozê de keştî gihandiye heqîqetê û dibêje ‘Ez deyndarê Kurdam e’. Ez jî weke Kurdekî dibêjim; hevrê Huseyîn tu ne deyndarê me ye, em deyndarê te ne. Em ê wî deynê xwe jî bi afirandina welatekî azad, bi avakirina welatekî demokratîk, bi afirandina welatekî ji welatiyên azad ên Kurd û Elewî bidin. Em ê wî welatî diyarî te, Apê Mûsa, Gûrbetellî Erosz, Nagîhanan û Naziman bikin. Careke din bila serê me hemûyan sax be. Di serî de hevalên wî yên kar bila serê malbatê sax be. Hevrêyê me Huseyîn wê her tim li cihê herî pîroz ê dilê me be.”
