Li gundê Lîcik ê navbera navçeya Gimgim a Mûşê û navçeya Kanîreşê ya Çewlîgê, li dijî projeya JES’ê ya şîrketa Emerîkî IGNIS H2 Enerjî Hilberîn A.Ş. berxwedana gundî û ekolojîstan dewam dike.
Piştî ku makîneyên kar pêr li ser nerazîbûna gundiyan ji qadê vekişiyan, gund vê sibehê ji aliyê jendermeyan ve hate dorpêçkirin.
Rayedarên şîrketê bi makîneyên kar careke din ketin nava gund û dest bi kar kirin.
Li ser vê yekê xelkê Lîcikê li gel hawirdorparêzên ji gundên derdorê û ekolojîstên ji Gimgimê û nûnerên partiyên siyasî li qadê li hev civiyan.
Girseya gel ber bi qadê ve meşiya û di encama hevdîtinên navbera girseyê û rayedarên şîrketê de karên li qadê bi demkî hate raweestandin û makîneyên kar ji qadê hatin derxistin.
Nûnerên Platforma Parastina Jîngehê ya Geliyê Perî di daxuyaniya çapemeniyê de axivîn û xwestin ku sozên hatine dayîn bên bicihanîn û proje bi temamî were betalkirin.
Platformê diyar kir ku ji bo 3-4 rojan dem ji wan re hatiye dayîn û ragihand ku ew ê di vê demê de têkoşîna hiqûqî, siyasî û civakî bidomînin.
Platforma Ekolojiyê ya Vartoyê jî destnîşan kir ku têkoşîn divê tenê ji nêrînên burokratîk re neyê hiştin û bang kir ku divê gelê herêmê hîn xurttir beşdarî pêvajoyê bibe.
Ekolojîst îfade dikin ku projeya JES’ê wê zirar bide çandinî û sewalvaniyê û xeteriya qirêjbûna av û xakê jî heye.
Platforman diyar kirin ku proje ne tenê Lîcikê, pirsgirêka hevpar a gundên li derdor jî ye û daxwaz kirin ku proje bi temamî were betalkirin.
Gundiyan ragihand ku ew ê piştî biryara rawestandinê ya demkî nobetên xwe yên li herêmê bidomînin û têkoşîna hiqûqî bidomînin.
