Bi wesîleya 25’ê Mijdarê Roja Têkoşîna li dijî Tundiya li ser Jinê gaziya şer a li Bakur û Rojhilatê Sûriyeyê Gulçîn Xoşmêr nêrînên xwe anîn ziman.
Gulçîn Xoşmêr di destpêka axaftina xwe di şexsê xwişkên Mîrabal de tevahî jinên di oxira azadî û wekheviyê de şehîd bûne bi bîr anî û got, “Em dikevin salvegereke nû ya 25’ê Mijdarê. Weke jinên şoreşger em ne xerîbê rojên wer ên bi xwîn, ked û berxwedana jinan bûne malê dîrokê ne. Jinan ji bo jiyaneke azad û wekhev bi hezarê salane bi awayekî têkoşîn kirine, li ber xwe dane. Ev rêûresma berxwedanê di Tevgera Azadiya Jinên Kurdistanê de ku bi felsefe û bîrdozî Rêber Apo pêş ketiye di asta herî jor de ye.”
Gulçînê bal kişand ser berxwedana yek ji pêşenga Tevgera Azadiyê Sakîne Cansiz û wiha axivî, “Hevala Sakîne li Zindana Amedê di pêvajoyeke ku zilm, zext û hovîtî bêsînor bû de, li ber xwe da. Hevala Sakîne li qawîşa têde hemû jin rêxistin kirin, îrade û hêza berxwedanê da hemûyan. Li wê qawîşa jinan hemû girtiyên jin ne PKK’yî bûn jî. Lê ji sekn û berxwedana hevala Sakîne bandor bûn û wan jî biryara berxwedanê dan. Li çiyayan jî hevala Bêrîtan li hember hişmendiya teslîmiyet, xiyanet û hevkariyê berxwedaneke herî muezem nîşan da. Hevrê Zîlan, Viyan, Rûken, Asya û hwd. bi sedan jinên Apo li hember zîhniyeta mêrperest û desthilatdar bûn sembola têkoşînê.”
Gaziya şer Gulçîn Xoşmêr destnîşan kir ku 25’ê Mijdara îsal rastî pêvajoyeke nû ya bi Banga Aştî û Civaka Demokratîk a Rêber Apo hatiye û ev anî ziman, “Di vê çarçoveyê de jî 25’ê Mijdara îsal xwedî wateyeke cudatir e. Divê tevahî jin bi ruh û îradeyeke herî xurt li hember zext, tundî û neheqiyan rawestin. Ti kes ji derve de nayê zext, tundî û neheqiya li jinan tê kirin ji holê raneke. Pêwîst e, em weke jin bi yekîtî, rêxistin û xweparastinê têkoşîna xwe bi serketinê tacîdar bikin. Rêbertî dibêje, ‘Divê jin cesaretî jiyana azad jî bikin.’ Li ser vî esasî divê em têkoşîna xwe xurt bikin û ji bo jiyana xwe azad bixebitin. Ji bo rêxistinkirina jiyana azad a sosyalîst a xwe dispêre sîstema komunal a demokratîk hewce ye em berxwedanê di asta herî bilind de pêş bixin.”
