Roja duyemîn a çalakiya sê rojan a ji bo azadiya fîzîkî ya Rêber Apo li Strasbourgê bi beşdariyeke zêde bi dawî bû. Çalakgeran, tevahiya rojê li stanta agahdarkirinê ya ku li Qada Place Kléberê hatibû danîn, gel derbarê şert û mercên tecrîda li Îmraliyê û girîngiya azadiya Rêber Apo ya ji bo pêvajoyên aştiyê de agahdar kirin. Gelek kes hatin ber standê, pirs pirsîn û peyamên hevgirtinê şandin.
Di çalakiya ku tevgerên ciwan û jinan pêşengî lê kirin de, hate diyarkirin ku divê kampanyaya azadiyê were qada navneteweyî. Çalakgerên ku li qadê nobet girtin, di axaftinên kurt de daxwaza xwe ya ji bo bidawîkirina sîstema Îmraliyê û pêkanîna azadiya fîzîkî ya Rêber Apo dubare kirin.
Di xebatên rojê de belavkirina daxuyaniyan, axaftinên agahdarkirinê û sohbetên rûbirû bi gel re berbiçav bûn. Çalakî heta êvarê domiya.
Çalakgeran ragihandin ku ew ji bo roja sêyemîn û dawî ya ku dê sibê were lidarxistin, beşdariyeke berfirehtir armanc dikin û gelê Strasbourgê vexwendin hevgirtinê.
