Dayika yek ji qadroyên pêşeng ê PKK’ê Sakîne Cansiz Zeynep Cansiz, li bajarê xwe yê Dêrsimê hate definkirin. Cenazeyê Zeynep Cansizê li ser wesîyeta wê li goristana bajêr a ku gora Sakîne Cansiz lê bû hate definkirin. Beriya merasîma definkirin, cenaze birin mala wê û riza jê hate xwestin.
‘OXIR BE DAYIKA GEL’
Herî dawî ji bo Zeynep Cansizê li cemxaneyê merasîm hate lidarxistin. Xwişka Zeynep Cansizê Guneş Cansiz di merasîmê de axivî û ev tişt got: “Hevrêyên Sakîne û yên xwişka min li vir in, hûn bixêr hatin. Xwişka min çinara malbata me bû. Ez nabêjim dara çinara me ketiye, ji ber ku dara çinara me neketiye, ew hîn jî li ser pêyan e. Ew ji bo zarokên xwe tim li ser pêyan bû. Dayika min jinek hêja û dayikek bû. Xwişka min gelek îşkence dît. Lê, ew çû cem Sakîne. Oxir be dayika gel.”
PEYAMA AZADÎ Û BERXWEDANÊ
Piştre Hevseroka Giştî ya DBP’ê Çîgdem Kiliçgun Uçar axivî û wê jî ev tiştan bi lêv kir, “Em hewl didin ku pêş de biçin. Em û heval Sakîne Cansiz, zarokên Zeynep Cansiz in. Heta ku em bijîn û wextê me hebe, em ne dev ji azadiyê û ne jî ji berxwedanê bernadin. Çiqas zilmê li me bikin jî, çiqas êrişî me bikin jî, em ê ne dev jê berdin û ne jî paşve gav bavêjin. Armanca me berxwedan û azadî ye. Heval Sakîne Cansiz ji me re pêşengî kir. Wê di têkoşîna azadiya Kurdan de pêşengî kir û pêşengiya ciwanên Kurd kir. Azadî dê her tim li ser zimanê me be û berxwedan jî dê her tim di fikrê me de be. Em li vir in, em naçin, em ê paşve gav neavêjin. Lê ev gul dê her tim li her derî vebin û qet neçilmisin.”
‘EM Ê XWEDÎ LI RÊYA XWE DERKEVIN’
Aktîvîsta TJA’yê Gulten Kişanak jî got xwezî îro Sakîne Cansiz li vê derê bûya û wiha axaftina xwe berdewam kir: “Xwezî heval Sakîne îro li vir û li gel me bûya. Ji ber vê yekê em hemû îro li vir in, wek heval û hogirên wê, em berpirsiyariya xwe hildigirin ser xwe. Em ê Dayika Zeynep bişînin rêwîtiya wê ya dawî mîna ku rêhevala me Sakîne jî bi me re be. Bila ew di nav aramiyê de, di nav ronahiyekê de, bi aramî razayî be. Jiyanek dijwar û bi rûmet jiya. Ji Komkujiya Dêrsimê bigire heta Zindana Amedê û ji wir bigire heta Komkujiya Parîsê wê ev êşên mezin bi rûmet hilgirt. Ji bo me ew her tim sembola bi rûmet, berxwedêr û azad e. Em gelek deyndarê Sakîne, Dayika Zeynep û hemû kesên ku me winda kirine ne. Em bîranîna wan bi rêzdarî bi bîr bînin û emê xwedî li nirxên wan jiyana xwe ji bo wan ji dest dan, derkevin. Em ê xwedî li axa xwe, zimanê xwe, li rêya xwe derkevin. Oxir be dayika Zeynep.
Piştî axaftinan ji bo definkirinê, cenazeyê Zeynep Cansiz anîn gundikê Tatxal ê gundê Korkezê û li vir hate veşartin.
