Îro cejna Çarşema Serê Nîsanê ya civaka Êzidî ye hemû Êzidî vê rojê weke roja kewna dinyayê, serê sala xwe û cejna Melekê Tawis dibînin û bi coşeke mezin pîroz dikin. Li Şengalê Cejna Çarşema Nîsanê, xêr û bereketa biharê bûne yek û vê jî coşa cejma îsal ji salên borî zêdetir kiriye.
Li Şengalê yek ji cihê ku Êzidî herî zêde lê kom dibin û Çarşema Serê Nîsanê pîroz dikin jî Deriyê Geliyê Kersê ya Şengalê ye. Pîrozbahiya îsal a li Geliyê Kersê, ji aliyê Navenda Çand û Hunera Şengalê û Navenda Stiya Nexşa ve hat lidarxistin.
Piştî ku di saetên sibehê de xelkê cejna hevdû pîroz kir, bi saetên nîvro re bi hezaran jin, zarok, ciwan û ji her temenî xelk bi coşa biharê herikîn qada pîrozbahiyê. Bernameya îsal a Çarşema Serê Nîsanê di heman demê de weke festivaleke çand û hunerê hatiye amadekirin ku li qada pîrozbahiyê pêşangeha wêneyan, konê pirtûkan û standa Jîneolojiyê jî cih digire.
Ji ber ku pîrozbahiyên li Laleşa Nûranî bi hinceta ewlekariyê hatiye betalkirin, gelek Êzidiyên ji kampên Başûrê Kurdistanê û herêma Şêxan jî ji bo pîrozkirina cejnê berê xwe dane Şengalê. Her wiha ji Qendîl, Silêmaniyê, Mexmûr û Bexdayê jî hejmarek mêvan ji bo pîrozbahiya Çarşema Serê Nîsanê hatine Şengalê û li pirozbahiya li Geliyê Kersê amade bûne.
Bernameya Çarşema Serê Nîsanê bi xwendina beşek ji Qewla Çarşema Nîsanê dest pê kir. Piştî xwendina qewlê, ji bo ruhê hemû şehîdên 74 fermanan û şehîdên azadiyê deqeyek rêz hate girtin.
Di şahiyê de peyamên ku ji derve hatine, her wiha peyamên şandeyên ku ji bajarên cuda yên Başûrê Kurdistanê û Iraqê beşdar bûne hatin xwendin. Li gel van peyaman du peyamên girîng gihîştin qada pîrozbahiyê. Merciya Olî ya Êzidiyan, Bavê Şêx peyameke bi deng şand ahenga Çarşema Serê Nîsanê ya li Geliyê Kersê. Her wiha Endama Konseya Serokatî ya KCK’ê Sozdar Avesta ji bo pîrozbahiya Çarşema Serê Nîsanê peyameke taybet ji Şengalê û tevahiya Êzîdxanê re şand.
Di şahiyê de herwiha peyama Meclîsa Gel a Şengalê, peyama şandeyên Mexmûr û Qendîlê jî hatin xwendin.
Piştî xwendina peyamên pirozbahiyê, bernameya hunerî ya şahiyê dest pê kir. Koma Hêviyên Şengalê ya Stiya Nexşa, Kolektîfa Saza Êzidî ku ji gelek dengbêj, hunermend û tembûrvanên Êzidî pêk tê, Koma Bêrîvan a Stiya Nexşa û hunermend Hemîd Qîranî wê bi stran û dûrikên xwe coşa pîrozbahiyê bilind bikin.
Pîrozbahiya Çarşema Nîsanê bi stranên Koma Hêviyên Şengalê bi coş berdewam dike.
