Meclisa Malbatên Şehîdan a bajarê Hesekê yê kantona Cizîrê ji bo şervanên Hêzên Sûriyeya Demokratîk Xidir Mano (Brûsk Mano) ku di 8’ê Çileyê de di berxwedana Tişrînê de şehîd bibû, Ebdulhemîd El Ebd (Enwer Dêrik) ku d 2’yê Çileyê di berxwedana Tişrînê de şehîd bibû û endamê Hêzên Ewlekariya Hundirîn Mihemed El Ebdullah ku di 3’yê Nîsanê de dema li ser erkên xwe bû li Dêrazorê şehîd bû li Goristana Şehîd Dijwar merasîmek li dar xist.
Di merasîmê de nasnameya şervana Yekîneyên Parastina Jin (YPJ) Şêrîn Fetah (Gerîla Qamişlo) ku di 20’ê Adara 2024’an de li herêma Tel Rifetê şehîd bibû, hat aşkerekirin.
Merasîm bi deqeyeke rêzgirtinê û merasîma leşkerî dest pê kir. Piştre li ser navê Meclisa Malbatên Şehîdan Ehmed El Herês axivî û sersaxî ji malbatên şehîdan re xwest. El Herês da zanîn ku xwîna şehîdan bingeha jiyana hevbeş û azadiya herêmê ava kir.
Endamê Têkiliyên Leşkerî yê Meclisa Leşkerî ya Hesekê Birûsk Hesekê axivî û tekez kir ku xwîna şehîdan misogeriya ewlekariya civakê ye. Her wiha soza şopandina rêya şehîdan da.
Endama Meclisa Malbatên Şehîdan Rojda Ehmed belgenameyên şeîdan xwend û radestî malbatên wan kir.
Malbatên şehîdan diyar kirin ku ew bi fedekariya şehîdên xwe serbilind in û diyar kirin ku ew ê li ser rêya şehîdan têkoşîna xwe dewam bikin.
Cenazeyên şehîdan bi berzkirina dirûşma “Şehîd namirin” hatin veşartin.
