Malbatên şehîdan ên bajarê Minbicê di sibeha Cejna Remezanê de dema ku çûn serdana gorên zarokên xwe yên şehîd, dîtin ku çeteyên dewleta Tirk a dagirker gorên şehîdan şikandine û wêran kirine, ev yek di nava şêniyan de bû sedema herseke mezin.
Malper û rûpelên li ser torên civakî bi dehan wêne û vîdyo belav kirin ku wêrankirina nîşan didin, weke çawa çeteyên dewleta Tirk a dagirker li mezarên şehîdan li bajarên din ên ji aliyê Tirkiyê û çeteyên wê ve hatine dagirkirin, kirin.e
Malbatên şehîdan dan zanîn ku xerakirina goran binpêkirina pîroziya şehîdan e û hewldana ji holê rakirina sembolên têkoşîn û fedakariyê ye.
ÊRÎŞA LI DIJÎ GORÊN ŞEHÎDAN LI HELEB Û TIL TEMIRÊ HATE ŞERMEZARKIRIN
Meclisên Malbatên Şehîdan li Heleb û Til Temrê der barê xerakirina Mezara Şehîdan a Minbicê ji aliyê çeteyên dewleta Tirk a dagirker ve du daxuyaniyên cuda dan.
Li taxa Şêx Meqsûd a bajarê Helebê di daxuyanî li qada Cebanatan ji aliyê Hevseroka Meclisa Malbatên Şehîdan a Helebê Henan Kedro ve hate xwendin.
Di daxuyaniyê de hat gotin, “Dewleta Tirk a dagirker bi awayekî sîstematîk nirx û rêgezên mirovahiyê binpê dike, ku gihiştiye asta wêrankirina goristan û cihên pîroz, weke çawa berê li Efrîn û Şehbayê ya dagirkirî kiriye.
Di daxuyaniyê de hate destnîşankirin ku ev kiryarên dijminane ne nû ne, ji ber ku beriya niha li Girê Spî, Serê Kaniyê û Bakurê Kurdistanê sûcên bi vî rengî pêk anîne, hatiye kirin.
Di daxuyaniyê de bang li civaka navdewletî û rêxistinên mafên mirovan hate kirin ku rola xwe pêk bînin û van kiryaran rawestînin. Her wiha ji rayedarên Şamê û aliyên peywendîdar xwest ku gavên ji bo parastina pîroziyên neteweyî gavên rasteqîn bavêjin.
Li bajarê Til Temirê daxuyanî ji hêla hevserokê Meclisa Malbatên Şehîdan li Til Temirê Mihemed Eliyat ve hate xwendin.
Di daxuyaniyê de wiha hat gotin: “Sibeha Cejna Remezanê, li bajarê Minbicê kiryareke hovane qewimî ku hestên me êşand û rûmeta şehîdên me yên rewa binpê kirin. Kesên nediyar, bê wijdan û nirxên mirovahiyê, mezarên şehîdên ku canê xwe feda kirine, xera kirin. Ev kiryareke ku nayê efûkirin û nayê rewakirin e.”
Her wiha hate gotin: “Em bi tundî vê êrîşa eşkere ya li ser pîroziyên neteweyî şermezar dikin, û em bang li rayedarên peywendîdar dikin ku lêpirsînek lezgîn vekin da ku berpirsên vê kiryarê bên dadgehkirin.”
