Gerîlayên Azadiyê yên Kurdistanê ku li ser şopa fermandarên xwe meşa azadî û serketinê dimeşînin, 15’ê Tebaxê bi coş û kelecaneke mezin pêşwazî dikin.
Gerîlayên HPG û YJA Starê bi wesîleya salvegera 41’emîn a Pêngava 15’ê Tebaxa 1984’an ji ANF’ê re axivîn.
EM Ê BIBIN GERÎLAYÊN PÊVAJOYÊ
Berfîn Êrîş: Em destpêkê salvegera 41’emîn a Cejna Vejînê li mirovahiyê û Rêber Apo pîroz dikin. Pêngava 15’ê Tebaxê piştî ku fermandar Egîd li Dihê fîşeka destpêkê teqand destpê kir û kir ku gelê Kurd ji xewa mirinê hişyar bibe û ji bo hebûna xwe şer bike. Di heman demê de çalakiya li Dihê nîşanî tevahiya cîhanê da ku gelê Kurd ji bo hebûna xwe derketiye ser dika dîroka têkoşînê. Ev berxwedana ku bi pêşengiya fermandarê nemir Egîd hate destpêkirin, îro li tevahiya cîhanê ji bo hebûna gelê Kurd, têkoşîn û civaka demokratîk bûye mînakeke modelê. Bi taybetî weke şervanên ku li çiyê li ser şopa fermandarên xwe dimeşin, em ê dest ji xewn û xeyalên wan bernedin, bi baweriyeke mezin em ê têkoşîna azadiyê dewam bikin. Em ê her tim li ser şopa fermandarê xwe bin, weke şervanên wî em ê bi hezaran Egîdan biafirînin. Bi taybetî li gorî pêvajoya heyî em ê weke gerîla bi rola xwe rabin.
ARMANCA HEVRÊ EGÎD GIHÎŞT SERKETINÊ
Şoreş Kobanê: Beriya her tişî bejna xwe li ber ked û nirxên fermandar Egîd ditewînim, wî bi hurmet bi bîr tînim. Di heman demê de hemû hevalên ku di pêngava Dihê de şehîd bûn bi minet û hurmet bi bîr tînin, soza ku me dane wan ku li ser şopa wan bimeşin dubare dikin. Weke ku tê zanîn çalakiya 15’ê Tebaxa 1984’an bi fîşeka destpêkê ya fermandar Egîd destpê kir. Ev çalakî gelekî mezin û bi wateyeke hêja bû. Gelê Kurd hişyar kir, kir ku bi hêza xwe bihese. Bi taybetî ji bo me girîng e bê em îro Pêngava 15’ê Tebaxê çawa pêşwazî dikin. Ji sala 1984’an heta 2025’an têkoşîna me ya çekdarî ya ku fermandar Egîd da destpêkirin dewam dike. Bi banga Rêber Apo ya ji bo bidawîkirina têkoçîna çekdarî re em fêhm dikin ku armanca hevrê Egîd bi ser ketiye. Ji niha û pê ve em ê bi ruhê 15’ê Tebaxê têkoşîna xwe ya siyasî û îdeolojîk dewam bikin. Têkoşîn û berxwedana ku hevrê Egîd da destpêkirin, nîşan da ku têkoşîna gelê Kurd têkoşîna mirovahiyê ye. Weke şervanên hevrê Egîd em ê bi ruhê Pêngava 15’ê Tebaxê banga Rêber Apo xurt bikin. Em ê têkoşîn û azadiya gelan mayinde bikin.
EM Ê BIKIN KU PÊVAJOYA AŞTIYÊ BIGIHÊJE ENCAMÊ
Hogir Cûdî: Bi taybetî Pêngava 15’ê Tebaxê li Rêber Apo û gelê me pîroz dikim. Pêngava ku fermandar Egîd da destpêkirin, jiyaneke nû da afirandin. Ji bo gelan, bi taybetî ji bo gelê Kurd dihate wateya jinûve vejînê. Ji bo gelekî ku bi sedan salan hate parçekirin û tinebûn lê hate ferzkirin, bi vî rengî dikare bê pênasekirin. Li gel ku gelek caran raperîn û têkoşîn hate meşandin jî Pêngava 15’ê Tebaxê guherîneke gelekî meizn bi xwe re anî. Li Kurdistanê navê Egîd li hezaran zarokan hate kirin. Ev yek encama Pêngava 15’e Tebaxê ye. Eger em îro li çiyê li ber xwe didin, eger gelê me ji bo azadî û zimanê xwe têdikoşe, ev yek encama vê pêngavê ye. Ji sala 1984’an û vir berdêlên gelekî giran hatin dayin, serketin û destketiyên mezin hatin bidestxistin. Em her sal vê rojê weke jinûve vejînê û destpêka avakirina nû pîroz dikin.
Em îsal jî 15’ê Tebaxê bi coşeke mezin pêşwazî dikin. Ji ber vê yekê divê her kes, bi taybetî jî gelê me li her devera ku lê ye vê rojê bi coşeke mezin pîroz bike. Ji ber ku rojeke gelekî bi wate ye, roja raperîna li hemberî dagirkeriyê ye. Êdî Kur dne Kurdê berê ne; li hemberî serwer û dagirkeran serî hildane. Kurd îro li her qadê xwe bi pêş ve biriye, ji bo azadî û mafên xwe têdikoşe. Kurdên îro ji mirinê natirsin, Kkurd ji mirinê hîn mezin e û êdî xwe nas dike. Bi pêngava 15’ê Tebaxê re êdî Kurdên zane derketine ser dika dîrokê. Eger şer tê kirin, ev şer şerekî bi zanebûn ê ji bo azadiyê ye. Ji ber vê yekê em Cejna Vejînê careke din li gelê xwe, li Rêber Apo û hemû hevalan pîroz dikin. Em ê bi tevlîbûneke xurt, bi têkoşîneke xurt vê salê bi ser bixînin. Em ê bikin ku pêvajoya hatiye destpêkirin bi ser bikeve. Em ê Rêberê xwe azad bikin, armancên şehîdên xwe pêk bînin.
EM Ê HER TIM XWEDÎ LI RUHÊ HEVRÊ EGÎD DERKEVIN
Şahîn Gabar: Di sala 1984’an de pêngava 15’ê Tebaxê hate destpêkirin. Ev yek li Kurdistanê û di nava tevgerê de gaveke nû bû. Bi giştî hişyarbûna Kurdan ji xewê bû. Gelê Kurd bi wê fîşeka destpêkê re careke din xwedî li hebûna xwe derket. Bêguman ev gav bi fermandariya hevrê Egîd hate avêtin. Vê gava dîrokî bandoreke mezin kir, ji aliyê leşkerî ve jî encamên gelekî mezin bi xwe re anî. Destketiyên ku îro me bi dest xistine bi saya keda wan rojan bû. Hebûna me hem ji aliyê leşkerî hem jî ji aliyê civakî ve bi bandora 15’ê Tebaxê ye. Em hebûna xwe di nava Cejna Vejînê de dibînin; çawa ku 27’ê Mijdarê ji bo me mîladeke nû ye, 15’ê Tebaxê jî xwedî heman wateyê ye. Lewma ji bo me vejîneke nû ye; li Kurdistanê kir ku em xwe jinûve bi rêxistin bikin. Weke şervanên fermandar Egîd em soz dikin ku em ê her tim li ser vê rêyê bimeşin û her tim xwedî li ruhê hevrê Egîd derkevin.
EM Ê TÊKOŞÎNA XWE BI SER BIXÎNIN
Lezgîn Qoser: Pêngava 15’ê Tebaxê ji bo gelê Kurd gelek destketî bi xwe re anî. Em îro bi saya ked û destketiyên wê demê li ser piyan e. Bi ruhê 15’ê Tebaxê me xwe ji her alî ve nû kir, li ser wê bingehê şer kir, jiya û gihîştin vê astê. Îro bi pêşengiya Rêber Apo pêvajoyek hate destpêkirin. Pêvajoya Aştî û Civaka Demokratîk ji bo me gelekî hêja û bi wate ye. Piştî demeke dirêj dîtina Rêbertî û bihîstina dengê wî ji bo me bû cihê kêfxweşî û moralê. Ji ber vê yekê tevlîbûna li vê pêvajoyê bi ruhê 15’ê Tebaxê ji bo me gerîlayên HPG’ê gelekî hêja û bi wate ye. Em bi pêşengiya Rêber Apo û keda şehîdan gihîştin vê astê. Têkoşîn û berxwedana me heta roja îro li ser şopa Egîdan dewam kir. Li çar parçeyên Kurdistanê têkoşîn dewam dike, berxwedan tê kirin. Ji bo hêjayî şehîdan û Rêberê xwe bin, em tevlîbûna bi ruhê 15’ê Tebaxê ji xwe re dikin esas û soz didin ku em ê têkoşîna xwe bi ser bixînin. Ev yek jî wê bi azadiya Rêber Apo, gelê Kurd û Kurdistanê be.
EM Ê HETA DAWIYÊ XWEDÎ LI VÊ ROJÊ DERKEVIN
Botan Yilmaz: Îro li çiyayên Kurdistanê bi ruhê 15’ê Tebaxê em têkoşîna xwe dewam dikin. Di heman demê de em ew şervanin ku ji aliyê pêngava 15’ê Tebaxê ve hatine afirandin. 15’ê Tebaxê ji bo me gelekî bi wate û hêja ye. Ji ber ku 15’ê Tebaxê roja vejîna gelan e. Fîşeka destpêkê kir ku mirovahî careke din li hebûna xwe vegere. Ji ber vê yekê em soz didin ku em ê her tim xwedî li vê rojê derkevin, em ê her rojê bi ruhê 15’ê Tebaxê bikin têkoşîneke hîn mezin û xurt. Herî dawî em dibêjin; Bijî Serok Apo, Bijî 15’ê Tebaxê, Bijî Fermandar Egîd.
BI SAYA FERMANDAR EGÎD EM BÛN OKYANÛS
Avjîn Çiya: Salvegera 41’emîn a Cejna Vejînê li Rêber Apo, gelê Kurd û mirovahiyê pîroz dikim. Pêngava 15’ê Tebaxê gavek li dijî mejiyê dagirker û mêtinger bû. Fîşeka destpêkê ya ku fermandar Egîd teqand di heman demê de li hemberî xiyanet û nokeriyê bû; ji ber ku gelek kesên ku xwe Kurd dihesibandin her roj nirxên gel difirotin, mafên jin, zarok û ciwanan pêşkêşî bazarê dikirin. Pêngava 15’ê Tebaxê bi esasî li dijî vê zîhniyetê bû. Di heman demê de heqîqeteke civakî jî derxiste holê.
15’ê Tebaxê bersivek li berxwedan û çalakiya li zindana Amedê bû. Vê çalakiyê hebûn û heqîqeta gelê Kurd nîşanî faşîstan da. Fermandar Egîd hevrêyê heval Kemal û Mazlûm bû. Ji ber vê yekê bi çalakiya ku kir, nîşan da ku gelê Kurd û milîtanên Apoyî ti carî li hemberî xiyanet û înkarê serî natewîne. Hevalên Kemal û Mazlûm di encama vê dozê de canê xwe feda kirin. Bi saya têkoşîn û keda fermandar Egîd, em ji çem veguherîn deryayê, ji deryayê bûn okyanûs. Bi çalakiya Dihê re gelên bindest ji bo maf û azadiyê li hev kom bûn. Ji ber vê yekê îro em bi gelan re di heman dozê de têdikoşin. Weke hevrêyên fermandar Egîd em ê têkoşîna xwe her tim mezin bikin û gavên hîn xurt biavêjin.
