Endama Fermandariya Biryargeha Navendî ya YJA Starê Emîne Erciyes (Nazli Taşpinar), di 20’ê Nîsana 2020’ê de li herêma Garê ya Herêma Federe ya Kurdistanê di encama êrişeke hewayî ya dewleta Tirk de şehîd bû. Ji bo Emîne Erciyesê li Mêrsînê bîranîn hat lidarxistin. Bîranîn, ji hêla aktîvîstên Tevgera Jinên Azad (TJA) û Komeleya Alîkarî û Piştevaniya bi Malbatên Xizmên Xwe li Dergûşa Şaristaniyê Winda Kirin re (MEBYA-DER) hat lidarxistin. Wekîlê Partiya Wekhevî û Demokrasiyê ya Gelan (DEM Partî) ê Mêrsînê Alî Bozan, rêveberên partiyê û nûnerên saziyan û gelek kes tev li bûn. Bîranîn, bi deqeyek rêzgirtinê dest pê kir. Piştre jî sînevîzyona ji bo bîranîna Emîne Erciyes hatibû amadekirin hate pêşandan.
Piştre jî Berdevka Meclisa Dayikên Aştiyê ya Mêrsînê Emîne Eren axivî û got: “Emîne Erciyes, Nûreddîn Sofî û hemû kesên di têkoşîna azadiyê de jiyana xwe ji dest dane bi bîr tînin. Em dibêjin ‘Şehîd namirin.’ Malbata hevala Emîneyê malbateke muxafazakar û Tirk bû. Lê derket çiyayên azad ên Kurdistanê. Ji bo têkoşîna wê em çi bibêjin kêm dimîne. Divê em hêjayî wan bin. Em çi bikin jî kêm dimîne. Divê em hizra xwe bikin û pirsa ‘gelo em çi bikin dê layiqî şehîdan bibin?’ ji xwe bikn. Hewceye em bi şev û roj di nava xebatan de bin. Em soz didin ku heta Rêbertiya me azad dibe, heta çiyayên me azad dibin, heta girtiyên me azad dibin em têkoşîna xwe bidomînin.”
Bîranîn, bi çepikan û dirûşma “Şehîd namirin” bi dawî bû.
