Serokê Meclîsa Bajêr a Kerkûkê destnîşan kir ku divê di dema her llihevkirin û îmzekirinê de endamên Encûmenê û serokatiya wê agahdar bin.
Beşdarbûna Waliyê Kerkûkê di civîna Yekîtiya Şaredariyên Cîhana Tirk de û endambûna Kerkûkê di yekîtiyê de, gumanên li ser hewlên dewleta Tirk ên ji bo guhertina demografî û nasnameya Kerkûkê, her wiha ji bo armancên jeopolîtîk û dizîna nefta Kerkûkê bihêztir kirin.
Duh (31’ê Tîrmehê) li bajarê Karaman ê Tirkiyeyê, civîna desteya rêveber a Yekîtiya Şaredariyên Cîhana Tirk hate lidarxistin. Waliyê Kerkûkê Mihemed Seman jî beşdarî civînê bû û endambûna parêzgeha Kerkûkê di yekîtiyê de hat ragihandin.
Serokê Encûmenê Mihemed Îbrahîm Hafiz got, “Weke Meclîsa Bajêr haya me ji vê mijarê nîne. Pêwîste di dema her lihevkirin û îmzekirinê de endamên Encûmenê û serokatiya wê bên agahdarkirin.”
