Fermandara Yekîneyên Jin ên Şengalê (YJŞ) Viyan Hebabî bi boneya 5’emîn salvegera şehadeta şehîd Seîd Hesen û Îsa Xwedêda ji ajansa Rojnews’ê re nirxandin kir. Viyan Hebabî di şexsê şehîd Seîd û şehîd Îsa de hemû şehîdên fermanê bibîr anî.
Viyan Hebabî ev tişt anî ser ziman: “Heval Seîd yek ji damezrînerên Yekîneyên Berxwedana Şengalê bû. Heval Seîd her tim xeteriyên li ser civaka Êzîdiyan didît, hîs dikir û ji ber wê her tim di nava rewşek amade de bû. Hevalê Seîd û biraziyê wê her dem bi hevre bûn. Bi hev re kar kirin, bi hev re ji aliyê PDK’ê ve hatin girtin û bi hev re gihiştin şehadetê. Çima bûn hedefa PDK? Ji ber ku wan îhtîmala êrişên li ser gel dîtin. Ji ber wê yekê jî ji aliyê PDK’ê ve li ser wan her tim zextek hebû.”
Fermandar Hebabî wiha behsa kesayeta fermandar şehîd Seîd Hesen kir: “Ew fermandar û mamosteyê jiyanê bû. Ji ber ku gel, ciwan û hawirdorê xwe perwerde û amade dikir. Ji ber wê jî jiyan jinûve li Şengalê vegeriya. Jiyan bi hevaltiya wî ya ji dil ve cardin hate xemilandin. Hezkirina wî tenê ne ji bo malbata xwe bû, hezkirina fermandar Seîd Hesen ji bo gelê xwe û hevalên xwe bû. Hevalê Seîd tu caran ji têkoşîna xwe gav paşve neavêt. Heta roja ku gihişt şehadetê jî têkoşîna xwe domand.”
Viyan Hebabî diyar kir ku dema li ser gel ferman çêbû, bû pêşeng û fermandar û wiha domand: “Karê ku jê dihat, pêk anî. Damezrînerê YBŞ’ê bû. Yek ji kesên ku dixwest û hewil dida hêzek leşkerî ya Êzidiyan ava bibe ew bû. Fermanê li çiya cihê xwe girt. Ji bo gel Şengalê vala neke, gelek keda wî çêbû. Encama keda wan jî îro YBŞ-YJŞ ye. Gelek ciwan di bin fermandariya wan de perwerde dîtin. Îro YBŞ encama keda wan e. YBŞ îro bûye bi hezaran ciwanên Êzîdî.”
Fermandar Viyan Hebabî destnîşan kir ku wê xwedî li keda şehîdan derkevin û wiha pê de çû: “Heta niha jî gelek dijmin û xêrnexwazên me hene. Hîn jî naxwazin Êzidî bibin xwedî hêz. Heta niha jî zext li ser gelê me heye. Tiştê em bikin jî xwedî derketina li keda şehîdan e, wê keda wan tu caran vala neçe. Di oxira azadiyê de me kesên weke hevalê Seîd şehîd dan, kesên weke Mam Zekî, weke hevalê Çeko, hevala Berîvan, heval Egîd Civyan, hevala Berfîn me şehîd dan. Gelek hevalên HPG li vê derê şehîd ketin, gelek ji wan jî piştî ji Şengalê derketin li cihên cuda şehîd ketin. Tişta ji me re esas, vê dozê gihandina serkeftinê û xwedî derketina şehîdane.”
Fermandar Viyan Hebabî di dawiya axaftina xwe de dubare hemû şehîdên meha Tebaxê bibîr anî û got: “Heta niha di fermanan de gelek şehîdên me çêbûne. Qehremanên weke; hevalê Berxwedan Tolhildan, hevalê Şêx Xeyrî derketin. Bi sedan, bi hezaran şehîdên me hene. Armanca me wê herdem ew be ku em hedefa wan şehîdên leheng pêk bînin.”
