Gaziyê şer û yek ji rêveberê Akademiya Şehîd Deştî ya Gaziyan Egîd Efrîn têkildarî şehadetên dawî yên li Rojavayê Kurdistanê axivî. Egîd diyar kirku dema dikevin ser rêya têkoşînê dizanin şehadet heye û got, “Ev di aqil û hişê her şervanekî re derbas dibe. Her şehîdek peyamekê dide me, rêyekê nîşanî me dide û barê me girantir dike. Şehadeta heval Sîpan ev nîşanî me da. Hinek hêz dixwazin rê li ber siyaseta Kurd bibirin. Hewl didin timî me bikişînin nav şer û me ji siyasetê dûr bixin. Naxwazin cih û statuyeke bi rûmet a gelê Kurd li dinyayê hebe. Em weke gelê Kurd îro xwedî aqilekî pir mezin in. Kurd zana ne û rêya xwe diyar kirine. Nayên lîstikên qirêj. Bala xwe bidinê ev bûyer kengî pêk tên? Dema hinek gavên berbiçav di navbera me û hikûmetê, dewletê yan jî bi şêwazên cuda tên avêtin bûyerên wisa dikin.”
Egîd Efrîn têkildarî êrîşên li hember şervanan jî ev anî ziman, “Cara berê dema hinek pêşketin çêbûn êrîşî Lîwaya Qamişlo kirin. Vê carê piştî ku rayedarên me li Şamê statuya gelê Kurd nîqaş dikirin û siyaseta gelê Kurd li ser maseyê bû bûyerên wisa dikin. Her wiha bûyerên wer ji rêzê jî nakin. Dest diavêjin malbatên bi dehan şehîdên xwe hene. Şervanên bi salan di nav têkoşînê de ji bo kerameta gelê xwe şer kirine dikin hedef. Van dîmenên hov jî li ser medya civakî belav dikin. Bi vî awayî dixwazin bi hestên gelê me bilîzin da ku bi zorê me bikişînin nav şer û lîstikan. Vê ji bo em di siyasetê de cihê xwe negirin dikin.”
‘ÊDÎ KES NIKARE PÊŞIYA STATUYA KURDAN BIGIRE’
Efrîn anî ziman gelê Kurd ji bo weke her neteweyê cihekî xwe yê bi rûmet li cîhanê hebe gelek berdêl dane û wiha berdewam kir, “Me şer kir ji bo rê li ber siyaseta Kurd vebe. Îro ya tê meşandin jî ev siyaset e. Li hemû welatan statuya gelê Kurd di nîqaşê de ye. Êdî kes nikare rê li pêşiya vê bigire. Lê dixwazin bi zextan me ji vê dûr bixin. Di bin navê çi de vê dikin? Dibêjin, ‘Newêrin şer bikin, ji şer ditirsin.’ Divê gelê me di vê mijarê de pir baldar be. Milletekî di her malbateke xwe de şehîd hene çawa wê ji şer bitirse? Me nîvê temenê xwe di nav şerên pir giran de derbas kir. Ti derdekî me yê em ji cîhanê re îspat bikin ku em ji şer ditirsin yan na, nîne. Yên şer nekirine û şer nedîtine bila kerem bikin biçin şer bikin. Eger pêwîst bike ji bo berjewendiyên gelê xwe em ê dîsa jî şer bikin. Lê îro şerekî çekdarî ne di xizmet û berjewendiyên gelê me de ye.”
‘ŞEHÎDAN JI BO ME NEXŞERÊYEK DIYAR KIRIN’
Egîd Efrîn axaftina xwe bi van hevokan bi dawî kir, “Di roja me ya îro de gelê Kurd bi saya fikir û ramanên Rêber Apo xwedî hêzeke mezin e. Dikare hemû komplo, êrîş û lîstikan pûç bike. Ji ber gelê me pir berdêl, ked û ewladên xwe yên herî qedirbilind ji bo şoreşê dan. Lewma divê li hember xêrnexwazan em gelekî hişyar bin. Gelê me bi her awayî heq kiriye ku weke her neteweyê xwedî heq û statu be. Bila gelê me û malbatên me yên şehîdan piştrast bin. Şehîdan ji bo me nexşerêyek diyar kirin. Ev rê ji bo me esas e. Em minetdar û deyndarên şehîdên xwe ne. Ji bo em xeyalên wan û doza ji bo vê canê xwe dan bigihînin serketinê çi ji destên me were em ê bikin.”
