Tirkiye bi ‘Banga Aştî û Civaka Demokratîk’ a Rêber Apo re kete nava demeke nû. Di vê demê de Tevgera Azadiyê ya Kurd ji bo pêşveçûna pêvajoya demokratîkbûna Tirkiyeyê gavên girîng avêt.
Di heman demê de DEM Partî û Partiya Herêman a Demokratîk (DBP) civînên gel lidar xistin, serdana malan kirin û bi vî rengî hewl da ji gel re qala pêvajoyê bikin.
Hevberdevkê Herêma Marmarayê ya DBP’ê Mevlut Aykoç li ser karên xwe yên têkildarî pêvajoyê li herêma Marmarayê meşandin û çavdêriyên xwe yên li civînên gel ji ANF’ê re axivî.
‘PIŞTÎ CIVÎNAN GEL TEVLÎ PÊVAJOYÊ HATE KIRIN’
Aykoç anî ziman ku weke DBP li herêma Marmarayê zêdeyî sed civînên gel lidar xistin û li gel van civînan ji civata welatparêz re qala pêvajoyê kirin.
Aykoç got, “Wateya van civînan mezin e. Di van civînan de me hem li ser pêvajoyê agahî dan gigrseya gel, hem jî hewl dan bersivê bidin pirsên girseya me ya têkildarî pêvajoyê. Bêguman ne karekî hêsan e ku tu rabe bi carekê pêvajoyê ji girseyê re vebêje û bike ku fêhm bike. Lê belê di civînan de yên ku em beşdarî wan bûn, me ev yek dît: Bi civînan re me dît ku girseyê pêvajo hîn baştir fêhm kir û piştî civînan tevkarî li pêvajoyê kir. Ev yek jî erênî û girîng e.
‘GEL DIXWAZE, PÊVAJO LI SER ZEMÎNEKE QANÛNÎ BÊ RÛNIŞTANDIN’
Aykoç diyar kir ku di civînên gel de wan li daxwaz û bendewariyên gel guhdarî kirin, daxwaza gel ew e ku pêvajo li ser zemîneke qanûnî bê rûniştandin û got, “Bendewariya gelê me û mirovên beşdarî civînan bûn bi vî rengî bû: Beriya her tiştî têkildarî hevalên me yên girtî sererastkirinên qanûnî bi lez bêne kirin. Ji bilî vê yekê pêvajoyeke şewitandina çekan pêk hat. Eger wê dest ji çekan bê berdan, ji bo gerîla karibin li vî welatî jiyana xwe dewam bikin divê sererastkirinên qanûnî bêne kirin.
Her wiha daxwaza ku Kurdî bibe zimanê fermî û zimanê perwerdeyê daxwaza me ya eşkere û şênber e. Di heman demê de em dixwazin statuya Kurdan bi rengekî qanûnî bê naskirin.
Destûra bingehîn a heyî bi feraseta ‘Yek ziman, yek dewlet, yek al’ ava bûye. Gelê me dixwaze, di dema pêş de destûreke welê bê avakirin ku gel karibin xwe bi rengekî azad îfade bikin. Di heman demê de qada ked û qada ekolojîk heye. Jin têne kuştin. Bi kurtasî ji bo her kes karibin xwe bi rengekî azad îfade bikin, bendewariyeke bingehîn a gelê me heye. Vê yekê dixwaze.”
‘EM PERWERDE Û RÊXISTINIYÊ JI XWE RE DIKIN ESAS’
Mevlut Aykoç destnîşan kir ku weke DBP ew girîngiyeke mezin didin perwerde û rêxistiniyê, karê wan ê destpêkê perwerdekirina kadroyên xwe têkildarî pêvajoyê ye û got, “Aliyekî bi vî rengî yê DBP’ê heye: Em partiyeke welê ne ku perwerde û rêxistiniyê ji xwe re dikin esas. Karê xwe yê ji bilî vê yekê di nava DEM Partiyê de dimeşînin ku em pêkhateyeke wê ne.
Bi giştî karên me yên perwerdeyê timî ye û em hewl didin xwe bigihînin girseyeke gelekî berfireh. Bi taybetî em ji xwe re dikin esas ku xwe bigihînin girseya welatparêz. Weke DBP em timî di nava pêvajoyeke perwerdeyê de ne û her pêvajoyê bi girseya xwe re nîqaş dikin. Lewma girseya herî zêde nêzî fêhmkirina pêvajoyê girseya DBP’ê ye. Em ê karên xwe yên li ser vê bingehê hîn zêde bikin.”
