Siyasetmedara Kurd Gultan Kişanak têkildarî êrîşên li ser Rojava, ji ANF’ê re axivî û tiştên qewimîne ne tenê weke êrîşeke leşkerî, weke hewldana tunekirineke piralî ya li dijî hebûna gelê Kurd, îradeya wê ya jiyana azad û modela jiyana hevpar nirxand.
Kişanak diyar kir ku ev êrîş di heman demê de modelaya jiyana hevpar a demokratîk, pirnasname û azadîxwaz a li Rojava hatî avakirin, hedef digire û got, ev model ne tenê ji bo Kurdan, ji bo hemû gelên Sûriyeyê hêvî û alternatîfê ava dike.
Kişanak anî ziman ku jin, nasnameya Kurdî û rûmeta civakî rasterast tê hedefgirtin û destnîşan kir ku gelê Kurd li Rojava berxwedaneke bi rûmet raber dike û bang li raya giştî ya navnetewey;î, tevgerên jin û hêzên demokratîk kir ku li dijî van êrîşan xeteke têkoşînê ya xurt û piralî ava bikin.
Gultan Kişanak diyar kir ku zihniyeta DAÎŞ’ê xwe li qadê jinûve nîşan da û sûcên şer dike û got, “Rêxistineke terorê ya hov niha di bin navê rêveberiya li Şamê tevdigere. Wezareta Parastinê ya Rêveberiya Şamê bi gotina ‘hin rewşên bêdisiplînî çêbûn. Me jî lêpirsîn vekir’ hewl dide rewşê sivik bike, lê ev ne rast e.”
Kişanak destnîşan kir ku sûcên şer û sûcên li dijî mirovahiyê yên li Rojava hatine kirin, nû nînin û ev tişt got, “Em van sûcên şer, sûcên li dijî mirovahiyê nas dikin. Ev ta ji sala 2014’an êrîşa li ser Şengalê tê. Di vê zihniyetê de wateya hebûna jinê jî nîne, jin encex bibe kole. “
Gultan Kişanak ragihand ku van êrîşan li çapa cîhanê nerazîbûneke xurt ava kir û got, divê ev nerazîbûn dewam bikin, ji ber ku xeterî derbas nebûye. Kişanak anî ziman ku ev zihniyet niha hewl dide weke dewlet xwe rêxistin bike.
DIVÊ TÊKOŞÎNEKE XURT WERE MEŞANDIN
Gultan Kişanak destnîşan kir ku têkoşîna jinê di vê pêvajoyê de bi roleke diyarker radibe û got, “Divê jin bi xwe rêxistinkirinê sekneke hîn xurttir raber bike. Di heman demê de divê bang li tevgerên jinan ên cîhanê were kirin ku bi wan re têkoşîneke hevpar were meşandin. Em ê hewl bidin vê yekê bikin, divê em bikin; em ê ya hîn baştir bikin û divê em van êrîşan rawestînin.”
Gultan Kişanak bang li raya giştî ya cîhanê jî kir û polîtîkaya hêzên kûreyî ya li ser Rojhilata Navîn rexne kir.
Siyasetmedar Gultan Kişanak bilêv kir ku jiyaneke bi rûmet ji bo gelê Kurd û jinên Kurd pir girîng e û diyar kir ku armanca wan a sereke ew e ku vê jiyana bi rûmet bi diyalog û rêyên aştiyane ava bikin.
Gultan Kişanak axaftina xwe wiha bi dawî kir: “Niha li Rojava drameke mirovî ya pir mezin diqewime. Dorpêç heye, pêdiviyên herî esas nayên pêşwazîkirin. Pêleke koçberiyê ya mezin car din çêdibe. Di van şert mercên zivistanê di rewşeke pir zehmet de koçber hene. Zarok ji serma jiyana xwe ji dest didin. Lewma divê em hemû demildest piştevaniyeke mezin rêxistin bikin û divê weke daxwazeke civakî ji Tirkiyeyê were xwestin ku deriyên sînor veke. Divê dorpêça li wir were şkandin û trejediya mirovî ya li wir were astengkirin.”
