Endama Meclîsa Giştî ya Partiya Yekîtiya Demokratîk (PYD) Hêvîn Reşîd li ser rewşa jinan a li Sûriyeyê ji ANF’ê re axivî.
Hêvîn Reşîd diyar kir ku di destûra bingehîn a heyî ya Sûriyeyê de tenê ji sedî 20 cih ji jinan re hatiye veqetandin û got, “Di dema derbasbûyî de, di dema rejîma Baasê de mafê her gel, netewe û bi taybetî jî mafên jinan hatin çewisandin. Dema ku mirov bala xwe didin ser destûra bingehîn a desthilata heyî dibînin ku tenê ji sedî 20 cih ji jinan re hatiye veqetandin. Ev yek li rastiya sedsala 21’ê nayê û xizmetê ji pêvajoya heyî re nake.”
Hêvîn Reşîd destnîşan kir ku jin ji bo mafên xwe bi dest bixin divê têkoşîna xwe mezintir bikin û axaftina xwe bi vî rengî dewam kir: “Em jinên Sûriyeyî divê dengê xwe bikin yek ku karibin guhertinê di destûra Sûriyeyê de çêbikin. Eger bi vê sîstemê dewam bike wê mafê jinê li Sûriyeyê tine be, jin wê di rêveberiya welêt de nebe û li qadên siyasî û leşkerî ji mafên xwe bêpar bimînin. Zêdeyî saleke di sîstema Sûriyeyê de guhertinek çêbûye, lê heman guhertin ji bo jinê çênebûye. Ji bo guhertin ji bo jinê bê kirin ji me tê xwestin ku em têkoşîna xwe bilind bikin û bi vî rengî mafên xwe bi dest bixin.”
Endama Meclîsa Giştî a PYD’ê Hêvîn Reşîd anî ziman ku divê jin li her devera Sûriyeyê dengê xwe bilind bikin û got, “Li her qada jiyanê divê jiyana her pêkhate û neteweyê li ser bingeha wekheviya jin û mêr bê birêxistinkirin. Heta ku wekhevî di navber jin û mêr de nebe, em ê gelekî gavan şûnde biavêjin. Ji ber ku di şoreşa Rojava de zincîra koletiyê hate qetandin û behna azadiyê hatiye girtin. Lê niha careke din vegera li jiyana paşmayî li me tê ferzkirin. Ji bo me jinên Kurd ev nayê qebûlkirin. Divê jinên Sûriyeyî li hemûı herêmên Sûriyeyê ji bo standina mafên xwe û jiyaneke azad dengê xwe bilind bikin. Divê di Sûriyeya paşerojê de mafên jinan li parlamentê û li nava wezaretan bê parastin û temsîlkirin.”
