Di daxuyaniyê de hate diyarkirin ku di roja me ya îro de hêzên desthilatdariyê li seranserî cîhanê îradeya xwe li civakan ferz dike û hate destnîşankirin ku modernîteya kapîtalîst ji bo feydeyê xwe nirxên mirovahiyê binpê dike. hate ragihandin ku ev pêvajo ezezîtiyê kûr dike û hilweşîna ekolojîk jî bi lez dike.
KCDK-E’ê diyar kir ku di van şert û mercan de avakirina jiyaneke demokratîk, wekhev û ekolojîk neçarî ye û anî ziman ku ev yek encex bi têkoşîna rêxistinkirî û kolektîf pêkan e.
KCDK-E’yê ragihand ku pirsgirêkên dermirovî yên gelên Kurd û Fîlîstînê, çavkaniya xwe ye ji berhemê sîstema mêtingeriyê ya modernîteya kapîtalîst digire û diyar kir ku her du pirsgirêk jî piştî Şerê Cîhanê yê Yekemîn ji aliyê hêzên emperyalîst ve li Rojhilata Navîn ji bo domandina kontrol û nifûzê hatine avakirin.
KCDK-E’yê destnîşan kir ku tevî xesp, înkar û zexta bi dehan salan, nekarîn gelê Kurd bêdeng bikin û bilêv kir ku gelê Kurd tevî zext û zilmê jî, 47 sal in têkoşîna azadiyê didomîne û bi hêza xwe hebûna xwe îspat kiriye.
KCDK-E’yê got, “Bi naskirina rastiya Kurd re li Tirkiye, Îran, Iraq û Sûriyeyê wê pêşiya demokratîkbûn û îstiqrara navxweyî were vekirin. Di heman demê de wê zemînê mudaxileya derve ji holê rabe; pirsgirêka Kurd eger bêçareserî were hiştin, wê hîn jî bibe bingehê sereke yê krîza civakî û polîtîk a van dewletan.
Bi banga Rêber Apo re Tevgera Azadiya Kurd dawî li têkoşîna çekdarî anî û stratejiya siyaseta demokratîk derxist plana pêş. Rêber Apo ev saleke bi rêya diyaloga bi dewleta Tirk re ji bo vekirina rêya aştiyê berpirsyariyeke dîrokî ya mezin digire ser xwe. Aştiya navbera gelê Kurd û dewleta Tirk, wê hêviyeke nû bide tevahî Rojhilata Navîn; serketina van hewldanên aştiyê wê bandorê li Îran, Iraq û Sûriyeyê jî bike. Lewma divê demildest azadiya fîzîkî ya Rêber Apo û statuya wî were diyarkirin.”
KCDK-E’yê di dawî de ev bang kir, “Di vê 1’ê Gulanê de divê em ji her demê hîn xurttir bibin yek, bi hev re tevbigerin û li dijî modernîteya kapîtalîst tifaqeke navneteweyî ya bindestan ava bikin. Ji bo aştî, azadî û jiyaneke bi rûmet têkoşîna hevpar, rêya esas a banga me ye.”
