Endamên Heyeta Îmraliyê ya Partiya Demokrasî û Wekheviyê ya Gelan (DEM Partî) Pervîn Bûldan û Sirri Sureyya Onder ji bo dîtina Serokê Giştî yê AKP’ê û Serokkomar Tayyîp Erdogan beriya bi rê bikevin li Meclîsê daxuyaniyek dan çapemeniyê.
Onder li ber deriyê Meclîsê bersiv da pirsên rojnamevanan û got, “Li gel Seroka me Pervîn em ê asta heyî ya pêvajoyê ji Birêz Serokkomar re ragihînin. Em ê wî agahdar bikin.”
Onder got, “Ji bo pêvajoya ji niha û pê ve em ê hem nêrîn û pêşniyarên wî werbigirin, hem jî pêşniyarên xwe pê re parve bikin. Em di wê baweriyê de ne ku qada siyaseta demokratîk hem ji bo aştî hem jî karên ji bo vê yekê wê bi gavên bi lez û xurt dewam bike.”
Sirri Sureyya Onder ji bo pirsa ‘Em dikarin bibêjin ku hevdîtineke dîrokî ye?’ bersiveke bi vî rengî da:
“Em gotinên welê mezin bi kar nînin. Ew yek biryara gel e. Me heta niha pevajo bi îrade û biryardariyeke mezin gihand vê astê. Em welê nêzîk bûn ku biparêzin. Her kes jî bi heman rengî nêzîk bû. Lewma em minetdarê tevahiya welêt in.”
Piştî Onder, Pervîn Bûldan axivî û got, “Dixwazim bibêjim ku ev yek hevdîtineke girîng e. Me heta niha gelek hevdîtin pêk anîn. Dixwazim destnîşan bikim ku ev hevdîtin girîng e. Ji ber ku Birêz Serokkomar wê yekemcar di vê mijarê de fikrê xwe bibêje. Wê têkildarî karên bêne kirin nêrîna xwe bîne ziman. Ji ber vê yekê em ê têkildarî hevdîtinên ku me heta niha kirine wî agahdar bikin. Bila ji bo Tirkiyeyê bi xêr be. Bila bibe wesîleya aştiyê.”
Heyeta Îmraliyê ya DEM Partiyê piştre ji bo biçe Kulliyeyê bi rê ket. Hevdîtin wê bi dema herêmî saet di 13:30’î de destpê bike.
