Fermandariya Giştî ya Hêzên Ewlekariya Hundirîn bi boneya salvegera 8’an a rizgarkirina Reqayê ji çeteyên DAIŞ’ê, daxuyaniyeke nivîskî weşand.
Fermandariyê di daxuyaniya xwe de wiha destnîşan kir:
“Îro, em salvegera 8’emîn a rizgarkirina Reqayê ji rêxistina terorîst a DAIŞ’ê bi bîr tînin. Ev qonaxeke neteweyî ye ku qurbaniyên qehremanên Hêzên Sûriya Demokratîk temsîl dike, yên ku can û xwîna xwe ji bo parastina rûmeta gelê Sûriyeyê û bidawîkirina serdemeke tarî ya terorîzm û neheqiyê dane.
Rizgarkirina Reqayê qonaxeke dîrokî ya diyarker di şerê li dijî terorîzmê de nîşan da û hêvî ji xelkê bajêr re vegerand, yên ku bi awayekî çalak beşdarî şerê rizgarkirinê bûn û piştî têkçûna DAIŞ’ê hevkarên rastîn bûn di bidestxistina serkeftinê û parastina ewlehiyê de. Ev salveger bîranînek e ji bo nirxê şehîdan ku axa Reqayê bi xwîna xwe av da, da ku ew bi awayekî azad, birûmet û ewle li xwediyên xwe vegere.
Ji roja rizgarkirina dîrokî û vir ve, Reqayê rêwîtiya xwe ya avakirin û ji nûveavakirinê berdewam kiriye, di salên borî de di warên xizmetguzariyên giştî, binesaziyê, perwerdehî, tenduristî û ewlehiyê de pêşketinên girîng dîtiye. Îro, xelkê Reqayê bi rêya saziyên sivîl û xizmetguzariyê, bi hevkariya Hêzên Ewlekariya Hundirîn, bûne xalên bingehîn ê rêveberiyê di kar û barên bajarê xwe de ku erka xwe ya parastina ewlehî û aramiyê û parastina destkeftiyên rizgariyê didomînin.
Em wek Hêzên Ewlekariya Hundirîn ên Bakur û Rojhilatê Sûriyeyê, bi vê boneyê pabendbûna xwe ya tam bi prensîbên yekitiya neteweyî ya Sûriyeyê û xebata ji bo xurtkirina aramî û ewlehiyê li hemû herêman, li ser bingeha nirxên edalet û wekheviyê û parastina rûmeta welatiyan bê cudahî, piştrast dikin. Her wiha em soza xwe ya li hember xwîna şehîdên xwe yên rast nû dikin ku em erka xwe bi berpirsyarî û dilsoziyeke tam bidomînin, da ku pêşerojekw ewle û aram ji bo gelê xwe misoger bikin.
Rûmet û nemirî ji bo şehîdên me yên rast, şîfaya bilez ji bo birîndarên me û serkeftina daîmî ji bo îradeya gelê me.”
