ENQERE: Înîsiyatîfa Azadî Ji bo Girtiyên Nexweş, di hefteya 609’emîn a çalakiya xwe de li ser Cadeya Sakaryayê kom bû. Di çalakiyê de dirûşmeyên weke ‘’Bila girtiyên nexweş werin berdan’’ û ‘’Tecrîd êşkence ye û bila were bidawîkirin’’ hatin berzkirin. Di çalakiya vê hefteyê de bal kişandin ser rewşa Cengîz Sînan Halîs Çelîk ê li Girtîgeha Girtî ya Tîpa S a Samsûnê tê ragirtin.
STENBOL: Çalakiya ‘’Rûniştina F’’ a ji aliyê Komîsyona Gîrtîgehan a Şaxa Stenbolê ya Komeleya Mafên Mirovan (ÎHD) ve tê lidarxistin, di hefteya xwe ya 237’emîn de jî berdewam kir. Çalakî li pêşiya bînaya komeleyê hate lidarxistin û bal kişandin ser rewşa Şefîka Kandar a ku li Girtîgeha Jinan a Amedê tê ragirtin.
Di çalakiyê de gelek caran dirûşmeyên weke ‘’Tedawî maf e nabe ku were astengkirin’’ û ‘’Tecrîd dikuje piştevanî zindî dike’’ hatin berzkirin. Her wiha di çalakiyê de pankarta bi nivîsa ‘’Bila girtiya nexweş Şefîka Kandar were berdan’’ hate vekirin û teksta çalakiyê ji aliyê endama ÎHD’ê Mûkaddes Şamîloglû ve hate xwendin.
