Doh Tiba Edlî ya Mûsilê nasnameya 32 qurbaniyên komkujiya Şengalê, ku di dîrok û gorên komî yên cuda de hatibûn derxistin, eşkere kiribû. Îro jî, ji bo bîranîna wan cangoriyên fermanê li gundê Koço yê Şengalê merasîma bîranînê hat lidar xistin. Merasîm bi deqeyek rêzgirtin destpê kir.
Di merasîmê de Meclîsa Rûhanê ya Êzdiyan, nûnerên saziyên sivîl, Rêveberiya Xweser a Şengalê, TAJÊ, fermandarên leşkerî û gelek kesayet amade bûn.
Di merasîmê de Berpirsê Tipa Edlî ya Bexdayê Bijîşk Zêd Elî Ebas axivî û hevxemiya xwe ya bi civaka Êzidî re parve kir û diyar kir ku ew xebateke berfireh ji bo tesbîtkirina nasnameyan dimeşînin.
Li ser navê qurbaniyan Rosîta Hecî ku ew jî demek di destê çeteyên DAÎŞ’ê de dîlgirtîbû axivî. Rosîta Hecî, anî ziman ku ew bi dehan qurbaniyên komkujiyê di pêvajoyeke ku hikûmeta Iraqê biryara efûya giştî ji bo çeteyan derxistiye de pêşwazî dikin û biryara hikûmetê bi tundî şermezar kir.
Rosîta Hecî got, “Civaka me ji aliyê dewlet û saziyê navnetewî ve hatiye piştguh kirin. Êrîş û gefa fermanê berdewam e. Bi dehan hestiyên bira, dayik û xwişkên me li benda hatinê ne. Zêdeyî 40 gorên komî li benda vekirinê ne. Bi hezaran malbatên me li Başûrê Kurdistanê di konan de dijîn. Lê hikûmeta Iraqê yek ji van rastiyan nedît û biryareke wiha da. Em şermezar dikin.
Piştî axaftinan sînevizyonek li ser cangoriyan hate pêşandan.
