Rêveberiya Serokê Dewletên Yekbûyî yên Emerîkayê (DYE) Donald Trump, piştî têkçûna hevdîtinên aştiyê yên li Pakistanê, êrişên leşkerî yên sînorkirî yên li hemberî Îranê jinûve nirxand.
Li gorî nûçeya The Wall Street Journal a ku agahiyên xwe dispêre rayedarên DYE’yî, ev alternatîf li gel dorpêça Emerîkayê ya li ser Tengava Hurmuzê tê nirxandin.
Hate ragihandin ku Trump her wiha kampanyayeke bombardûmanê ya berfireh jî daniye ser maseya xwe, lê belê ji ber rîska zêdekirina nearamiya herêmî vê rêyê zêde nade pêş.
ÎNGILISTAN: EM PIŞTGIRIYÊ NADIN DORPÊÇÊ
Serokwezîrê Îngilistanê Keir Starmer jî anî ziman ku ew ê piştgiriyê nedin dorpêça DYE’yê ya li ser Tengava Hurmuzê.
Starmer ji BBC re axivî û got, “Em piştgiriyê nadin vê dorpêçê. Em ê ber bi şer ve neyên dehfdan.”
Hate ragihandin ku li gel vê yekê jî Îngilistan ji dawiya meha Sibatê û vir ve bi “armanca parastinê” tevlî hin operasyonan bûye.
SPANYAYÊ NERAZÎBÛNEKE TUND NÎŞAN DA: TI WATEYA XWE NÎNE
Wezîra Parastinê ya Spanyayê Margarita Robles dorpêça deryayî ya DYE’yê “bêwate” pênase kir. Robles ji televîzyona cemaweriyê ya Spanyayê re axivî û ev gav weke “Xelekeke nû ji herikîna ber bi xeteriyê ve” pênase kir.
JI ÇÎNÊ BANGA XWÎNSARIYÊ
Çînê jî bang kir ku agirbesta navbera Îran û DYE’yê bê parastin. Berdevkê Wezareta Karên Derve ya Çînê Guo Jiakun anî ziman ku divê agirbesta demkî dewam bike û alî bi rêyên dîplomatîk çareseriyê peyda bikin, xwe ji şerekî vegirin.
JI MACRON PÊŞNIYARA ‘MÎSYONA PIR NETEWEYÎ’
Serokkomarê Fransayê Emmanuel Macron jî têkildarî rageşiya li Tengava Hurmuzê diyar kir ku wê li gel Qraliyeta Yekbûyî dest bi hewldaneke leşkerî û dîplomatîk a nû bikin. Macron got, ji bo di rojên pêş de mîsyoneke pir neteweyî ya aştiyane bê avakirin ew ê bi welatên ku amade ne tevkariyê li vê yekê bikin, konferansekê lidar bixin.
Macron anî ziman ku ev mîsyon wê li derveyî aliyên şer serbixwe û “ji bo parastinê” be û destnîşan kir ku armanc jî ew e ku azadiya ger û geştî li Tengava Hurmuzê pêk bîne.
LI ÎSRAÎLÊ 7 HEZAR Û 693 BIRÎNDAR
Li aliyê din, li gorî Wezareta Tenduristiyê ya Îsraîlê, ji destpêka şerê bi Îranê re 7 hezar û 693 kes birîndar bûn. Hate ragihandin ku 104 birîndar li nexweşxaneyan têne dermankirin û bîlançoya mirovî ya şer giran dibe.
