Bi sedan jinên bajarê Kobanê, gundewarên wê û herêmên din ên Firatê, îro li parlemena Jinan a li Bajarokê Şêranê li hev civiyan. Di civînê de li ser rola jinê ya di Sûriyeya pêşerojê de, cihê wê yê di nava civakê de û parastina destkeftiyên artêşa jinê (YPJ) nîqaş hatin kirin.
Jinên ku beşdarî civînê bûn ji ANF’ê re axivîn û diyar kirin ku ger jin di nava Sûriyeyê de cihê xwe negire, Sûriye nikare gavên mezin biavêje û dê hilweşe; lê belê ger jin bibe xwedî rol, dê welat bigihîje destkeftiyên pir mezin.
ŞOREŞA KU DEST PÊ KIRIYE, BI DESTÊ JINÊ YE
Endama Meclîsa Malbatên Şehîdan Eyşe Efendî, bal kişand ser projeya azadiya jinê ya ku çavkaniya xwe ji ramanên Rêber Apo digire û got: Di berxwedana bajarê Kobanê de û heta roja me ya îro, şoreşa ku dest pê kiriye bi destê jinê ye. Jina Kurd di her warê civakê de cihê xwe girt. YPJ’ê ji bo tevahiya jinên cîhanê li ber xwe da, terora DAÎŞ’ê têk bir û di heman demê de ew feraseta ku jinê piçûk dibîne jî herifand.
DIVÊ EM LI DORA HÊZA JINÊ BIBIN YEK
Eyşe Efendî bang li tevahiya jinan kir ku li dora hêza jinê kom bibin û wiha dewam kir: Li her derê jina Kurd bûye pêşeng û divê em jî wek jin li her derê rabin ser piyan. Dayika Rojava got, ‘Ez bêyî zarokên xwe dikarim bijîm, lê bêyî welat nikarim bijîm.’ Li Bakur li dijî polîtîkayên çewt berxwedaneke mezin hat kirin û li Rojhilat jî dirûşma ‘Jin, Jiyan, Azadî’ hat bilindkirin. Çendî êrîşî vê projeya jinê bikin jî, berevajî wê, bi sed hezaran jin dê tevlî bibin û xeleka azadiyê mezin bikin. Ger jin di nava civakê de tune be, ew civak hilweşiyayî ye û mîna kesekî ku nikaribe li ser piyan bisekine ye.
Ji pêkhateya Ereb û Kordînasyona Kongra Star a Firatê Loceyîn El Selîm jî anî ziman ku jinên Kurd û Ereb xwedî yek rihî ne û divê bi hev re di nava Sûriyeyeke demokratîk de bijîn. Loceyîn wiha got: “Civîna ku me li dar xist, vê peyamê dide ku em jin ji bo azadiyê li vir in. Ez wek jineke Ereb, bi rih û can li kêleka jina Kurd im. Em ê nîşan bidin ku jina Sûrî jineke azad û bi hêz e. Sûriye di nav salên dirêj de rastî gelek ziyan û êşan hat, jinan jî ev êş kişandin. Ji ber vê yekê em di heman armancê de yek in.
SÛRIYEYA AZAD BI JINA AZAD PÊKAN E
Loceyîn destnîşan kir ku Sûriyeyeke azad tenê bi azadiya jinê pêkan e û got: Jin di nava civakê de stûna esasî ye û em ê bi vê yekê bi ser bikevin. Armanca me ew e ku tevahiya jinên Sûriyeyê rabin ser piyan û ji bo parastina maf û nasnameya xwe li ber xwe bidin. Em ê li ser xeta şehîdên xwe bimeşin heta ku Sûriyeyeke azad a ku jin tê de azad e ava dikin.
BI DESTÊ JINÊ DAÎŞ TÊK ÇÛ
Dayika bi navê Nehîda Xelîl ku ev 7 sal in ji Serê Kaniyê koçberî Kobanê bûye, diyar kir ku avakirina Sûriyeyê bêyî jinê ne gengaz e û got: Jin, Jiyan, Azadî ye. Sûriye bêyî jinê nabe, ger bibe jî dê hilweşe. Em wekhevî û mafên xwe dixwazin. Em ji her kesî re dibêjin ku hêza me heye û hêza me jî YPJ ye. Me bi hezaran zarokên xwe di vê oxirê de feda kirin. Em bang li tevahiya Kurdan dikin ku rabin ser piyan, yekîtiya xwe ragihînin û em bi hev re di nava Kurdistaneke azad de bijîn. Wek dayikekê, ger jin di nava Sûriyeyê de neyê qebûlkirin, em tu carî sîstemeke wiha qebûl nakin. Bila her kes bibe xwedî zanîn ku DAÎŞ bi destê jinê têk çû.
Dayika bi navê Emîne Fetah Aqîl jî anî ziman ku ew bi saya felsefeya Rêber Apo gihîştine van rojan û wiha axivî: Berê, wek jin tişta ku me tenê dizanibû ew bû ku em misilman in û zimanê me Kurdî ye. Lê bi derketina Rêber Apo re çavên me vebûn; ew bû palpiştekî mezin ji bo jinê. Bi sedan heval li gel me bûn û em bi hev re têdikoşiyan. Em ê bi vê hêzê di nava Sûriyeyê de cihê xwe bigirin. Êdî vîna me heye ku em di her qadê de amade bin û paşvegavavêtin êdî nabe. Ger di destûra bingehîn a Sûriyeyê de jin tune be, an jî sîstem jinê qebûl neke, ne gengaz e ku ew sîstem bê pejirandin û bi ser bikeve.
