Bi biryara Komîsyona Demokrasî, Xwişk-Biratî û Piştevaniya Mîllî Serokwekîla Koma DEM Partiyê Gulistan Kiliç Koçyîgît, Alîkarê Serokê Giştî yê MHP’ê Fetî Yildiz û Alîkarê Serokê Giştî yê AKP’ê Huseyîn Yayman li Girava Îmraliyê hevdîtin bi Rêber Apo re kirin.
Nivîskar Mehmet Karakûş bûyerên dawî yên têkildarî pêvajoya aştiyê ji ANF’ê re nirxand û got, “Beriya her tiştî dema ku mirova gavên ji 27’ê Sibatê û vir ve hatine avêtin dinirxînin, hevdîtina komîsyonê ya bi Birêz Abdullah Ocalan re tê wateya derbaskirina qonaxeke girîng. Lê belê ev yek bi tena serê xwe têrê nake. Divê ev yek bê gotin: Eger CHP tevlî hevdîtinê bibûya wê rewş hinekî din cuda bûya. Tevlînebûna CHP’ê ne di wê kapasîteyê de ye ku pêvajo bi temamî bê têkbirin; lê belê ji aliyê CHP’ê ve meseleyeke girîng e. Ji ber ku nepêkan e ku CHP ji niha û pê ve karibe deng ji gelê Kurd werbigire.
Pêkhatina hevdîtinê gaveke gelekî girîng e, lê belê têrê nake. Hin mijarên din divê bêne şopandin ku vê gavê dewam bikin. Beriya her tiştî ji bo hiqûqa yekpare divê hin gav bêne avêtin. Divê xalên ‘Azadî’ û ‘Entegrasyona demokratîk’ bêne derxisitn. Bêguman destpêkê pêwîstî bi guhertineke destûra bingehîn a bi temamî heye. Êdî dema pêvajoya qanûnî divê destpê bike.
Bi taybetî qanûnên antî demokratîk divê werin guhertin. Ev gav wê ji bo çareseriya pirsgirêkê girîng bin. Bi taybetî xala 42’emîn a Destûra Bingehîn ku li pêşiya perwerdeya bi zimanê dayikê asteng e û xala 66’an a ku qanûna welatîbûnê diyar dike divê bêne guhertin.”
Karakûş diyar kir ku hevdîtina komîsyonê ji bo çareseriya pirsgirêka Kurd bi Rêber Apo re qonaxeke gelekî girîng e û axaftina xwe bi vî rengî dewam kir “Ji aliyê karên ji bo çareseriya pirsgirêkê bêne kirin ve guhdarîkirina li Rêber Apo weke muzakerevanê sereke girîng e, ji ber ku ji bo her derdorê diyarker e.”
‘GAVÊN HIQÛQÎ DIVÊ BÊN AVÊTIN’
Karakûş destnîşan kir ku bi destpêkirina pêvajoya qanûnî re di pêvajoya aştiyê de wê hîn bi lez encam bêne bidestxistin û got, “Beriya her tiştî divê gavên hiqûqî bêne avêtin, ji ber ku pêkhatina entegrasyona demokratîk gava destpêkê divê sererastkirinên hiqûqî be. Divê qanûnên ku karibin entegrasyonê pêk bînin werin derxistin. Zemîna hiqûqî ya entegrasyona demokratîk divê bi rengekî welê bê danîn ku mijarên siyasî, civakî, aborî û xweparastinê garantî bike, qanûnên ku baweriyê xurt bike zû bêne amadekirin.
Astengiyên li pêşiya vê pirsgirêkê bi guhertina hin xalan û avakirina xalên demokratîk dikarin ji holê bêne rakirin.”
