Daxuyaniya Hevserokatiya Konseya Rêveber a KCK’ê bi vî rengî ye:
“Di ser Komploya Navneteweyî ya 9’ê Cotmehê re 27 sal derbas bûn, ku di şexsê Rêber Apo de li dijî têkoşîna azadiyê ya gelê me hate kirin. Em vê komploya navneteweyî ya 9’ê Cotmehê ku yek ji komployên herî nexêr û herî tarî û qirêj a li dijî gelan e ya dîrokê ye, hêzên ku tevlî vê komployê bûne careke din bi tundî şermezar dikin. Di şexsê hevrê Halît Oral, Aynûr Artan û Selamet Menteş de ku bi dirûşma ‘Hûn nikarin roja me tarî bikin’ li dora Rêber Apo bûn xeleke ji agir û pêşengî ji têkoşîna li dijî komploya navneteweyî re kirin, hemû şehîdên şoreşê û demokrasiyê bi hurmet û minet bi bîr tînin, li pêşberî bîranînên wan ên hêja bi rêzdarî bejna xwe ditewînin. Van hevrêyên me yên hêja bi wêrekî, pêşdîtin û fedakariyeke mezin, bi helwesteke dîrokî encamên mezin afirandin. Bîranîna wan ji niha û pê ve jî wê rêya me ronî bike. Em hêzê ji wan werdigirin, li ser xeta wan dimeşin. Di encama rêberiya wan û têkoşîna li ser xeta wan, wê komploya navneteweyî ya ku heta niha bi serr neket, ji niha û pê ve jî bi ser nekeve, negihêje armanca xwe.
Komploya 9’ê Cotmehê weke operasyoneke navneteweyî hate plankirin û bicihanîn Ev pêvajoya ku bi dîlgirtina Rêber Apo bi encam bû, di serî de ji aliyê DYE, Îngilistan û Îsraîlê, ji aliyê hêzên navneteweyî ve hate meşandin. Ji xwe ev pêvajoya ku bi gefa vekirî ya li hemberî dewleta Sûriyeyê destpê kir, heman piştî civîna NATO’yê rû da. Bêguman dewleta Tirk ji ber dijminatiya xwe ya li Kurdan tevlî vê planê bû, lê belê yên ku ev plan afirandin û bi cih anîn hêzên navneteweyî bûn. Hêzên modernîteya kapîtalîst mêtinger ên Rojhilata Navîn li ser bingeha berjewnediyên xwe dîzayn dikin û talan dikin, ji ber ku xeta azadiyê ya Rêber Apo li hemberî armancên xwe yên emperyalîst kapîtalîst weke astengî dîtin, ketin nava planeke bi vî rengî.
Rêber Apo ji bo pêşî li kûrbûna şer bigire û rê li ber çareseriya siyasî demokratîk a pirsgirêka Kurd veke ji Sûriyeyê derket û çû Ewropayê. Rola diyarker a Ewropayê ya li ser afirandina pirsgirêka Kurd anî ber çavên xwe û ji bo vê rewşa xwe ya neyînî ya dîrokî çareser bike, firsendek da Ewropayê. Lewma Rêber Apo berê xwe neda çiyê û çû Ewropayê. Lê belê bi komployê bersiv ji vê armanca Rêber Apo re hate dayin. Dewletên Ewropayê ku li gorî plana DYE û NATO’yê tevgeriyan, ev şensê ku ji wan re hate dayin bi rengekî baş nekarîn binirxînin. Di berdêla berjewendiyên siyasî û aborî de nirx û hiqûqa xwe binpê kirin û piştgirî dan polîtîkaya qirkirina Kurdan a dewleta Tirk. Dewleta Tirk jî bi têgihiştina xwe ya dijminatiya li Kurdan tevgeriya, ji bilî vê yekê çavên xwe tiştekî din nedît. Ji bo pêşketinekê kêrhatî ji bo gelê Kurd pêk neyê her carê bi wî şûrê ku herdu aliyên xwe tûj e girt, ku hêzên hegemon ên navneteweyî dirêjî wê kir. Ji bilî vê yekê li tiştekî din nefikirî.
Gelek hêz tevlî nava komploya navneteweyî bûn, ku her yek ji wan xwedî berjewendiyeke cuda bûn. Lê belê yek ji armancên bingehîn ên komploya navneteweyî derxistina şerê navbera Kurd û Tirkan bû. Hêzên navneteweyî xwestin li Rojhilata Navîn şerekî di navbera Kurd û Tirkan de bidin destpêkirin û bi vî rengî serweriya xwe ya li Rojhilata Navîn salên dûr û dirêj dewam bikin. Hêzên komploger bi komployeke navneteweyî bersiv dan hewldanên Rêber Apo yên ji bo çareseriya siyasî demokratîk a pirsgirêka Kurd û bi vî rengî armanca xwe bi şênberî nîşan dan. Ji xwe dewletên Ewropayê û hêzên din hîn jî bi rengekî cidî piştgiriyê nadin çareseriya pirsgirêka Kurd, berevajî vê yekê di neçareseriya pirsgirêka Kurd de hewldanên vekirî û veşartî dimeşînin. Ev yek jî radixe pêş çavan ku ev polîtîka îro jî dewam dike. Di salvegera komployê de em dibêjin, hêzên ku tevlî vê komployê bûn dest ji van armancên xwe berdin, komployê dewam nekin, rexnedayina xwe bidin, di mijara çareseriya pirsgirêka Kurd de bi roleke pozîtîf rabin.
Rêber Apo ku armanca komploya navneteweyî dît, giranî da ser jinûve sererastkirina têkiliyên Kurd û Tirkan. Înkar ji holê rakir û li şûna cihêkariyê jiyana li welatekî hevpar a di nava yekîtî, wekhevî û demokratîk de destnîşan kir. Li gel tecrîd, êşkence û sîstema qirkirinê ya ku 27 salan di pêvajoya Îmraliyê de lê hate ferzkirin, di vê helwesta xwe de israr kir, ji bo vê têkoşiya. Pêvajoya ku îro bi navê ‘Pêvajoya Aştî û Civaka Demokratîk’ destpê kir, encamek ji vê hewldan û têkoşîna Rêber Apo ye. Lewma bi serxistina ‘Pêvajoya Aştî û Civaka Demokratîk’ re wê armancên komploya navneteweyî bê pûçkirin, çareseriya pirsgirêka Kurd û demokratîkbûna Tirkiye û Rojhilata Navîn bê pêkanîn. Berpirsyariyeke dîrokî ya gelê me û hêzên demokrasiyê ye ku vê rastiyê baş fêhm bikin û piştgiriyê bidin hewldanên Rêber Apo yên ji bo jinûve seerastkirina têkiliyên Kurd û Tirkan, çareseriya siyasî demokratîk a pirsgirêka Kurd û demokratîkkirina Tirkiye û Rojhilata Navîn. Di vê çarçoveyê de ji bo serketina ‘Pêvajoya Aştî û Civaka Demokratîk’ em bang dikin ku hevgirtina xwe hîn bi pêş ve bibin û têkoşîna hevpar mezin bikin.
Em dikevin salvegera duyemîn a Pêngava Azadiyê ya Navneteweyî ku weke parçeyek ji têkoşîna li dijî komployê destpê kir. Bi Pêngava Azadiyê ya Navneteweyî re gelên cîhanê, hêzên sosyalîst demokratîk, jinan û mirovahiya pêşverû azadiya Rêber Apo û çareseriya pirsgirêka Kurd weke armanceke bingehîn a têkoşîna navneteweyî ya mirovahiyê destnîşan kirin û dest bi vê pêngavê kirin. Vê têkoşînê encamên mezin afirand û wê hîn jî biafirîne. Bi wesîleya salvegera Pêngava Azadiyê ya Navneteweyî em careke din silav û hurmetên xwe pêşkêşî hemû dostan dikin ku ev têkoşîn dan destpêkirin û piştgiriya wê kirin. Bêguman serketina ‘Pêvajoya Aştî û Civaka Demokratîk’, wê bi azadiya fîzîkî ya Rêber Apo pêk were. Lewma em dibêjin, di sala sêyemîn a Pêngava Azadiyê ya Navneteweyî de êdî dem hatiye ku azadiya fîzîkî ya Rêber Apo bê pêkanîn. Divê ev yek weke armanca bingehîn bê dîtin û li ser vê bingehê têkoşîn li her derê bê bilindkirin.”
