Şandeya Koma Çep a Yekgirtî ya Ewropayê civînên xwe yên li Enqereyê qedand. Şandeyê li Meclîsa Mezin a Tirkiyeyê bi partiyên siyasî yên ku endamên Meclîsa Parlamenter a Konseya Ewropayê (MPKE) ne re civiya û li ser pêşketinên siyasî yên heyî nêrînên xwe parve kirin.
Di civînê de, nîqaşên li ser “Bêhukmiya Teqez” a CHP’ê hatin destgirtin û hat destnîşankirin ku Pêvajoya Aştî û Civaka Demokratîk ji bo demokratîkbûna Tirkiyeyê derfetek girîng e.
Endamên şandeyê diyar kirin ku ew zext û bêhiqûqiya li Tirkiyeyê ji nêz ve dişopînin û her wiha derbarê xebatên ku ji hêla partiyên siyasî ve têne kirin de agahî wergirtin.
BI SENDÎKA Û REXISTÊN SIVÎL RE HEVDÎTIN HATIN KIRIN
Şande piştre di şîveke ku ji hêla Sendîkaya Mulkiyeyan ve hat organîzekirin de bi nûnerên sendîkayên karkeran û rêxistinên civaka sivîl re civiya.
Di civînê de li ser pirsgirêkên aborî yên li Tirkiyeyê, zehmetiyên ku karker pê re rû bi rû dimînin û astengiyên li pêşiya sendîkayîbûnê nîqaş hatin kirin. Şandeyê li nêrînên nûnerên sendîkayî yên li ser pêşketinên heyî guhdar kir û diyar kirin ku ew krîz û pêşketinên civakî yên li Tirkiyeyê ji nêz ve dişopînin.
MAFÊN MIROVAN Û PÊVAJOYA AŞTIYÊ DI ROJEVÊ DE BÛN
Her wiha li ser binpêkirinên mafên mirovan jî nîqaş hat kirin, rêxistinên beşdar derbarê pirsgirêkên ku ew pê re rû bi rû dimînin û xebatên ku dikin de agahî dan. Her wiha li ser girîngiya Pêvajoya Aştî û Civaka Demokratîk jî rawestiyan û bal kişandin ser rola wê ya demokratîkbûn û aştiya civakî.
Rêveberên Konfederasyona Sendîkayên Karmendên Giştî (KESK), Sendîkaya Karmendên Perwerde û Zanistê (Egîtîm Sen), Komeleya Mafên Mirovan (ÎHD) û akademîsyenên aştiyê beşdar bûn.
Şandeya Koma Çep a Yekgirtî ya Ewropayê piştî hevdîtinan bernameya xwe ya li Enqereyê qedand
