DEM Partî li Tirkiye û Kurdistanê Kombûnên Aştî û Civaka Demokratîk dewam dike. Hevserokê Bajarê Stenbolê yê DEM Partiyê Çinar Altan li ser mijarê ji ANF’ê re axivî, bal kişand ser peyama bi dîmen a Rêber Apo û got, “Peyama bi dîmen a Birêz Ocalan û heyeta li Îmraliyê gelekî girîng e. Hem ji bo pêvajoyê hem jî piştî 26 salan hatina peyameke bi vî rengî ji Îmraliyê nîşaneya astekê dike. Di heman demê de tê wê wateyê ku asteke psîkolojîk a pêvajoyê hatiye derbaskirin.”
Çinar Altan diyar kir ku têkildarî pêvajoyê 3 hefte ne Kombûnên Aştî û Civaka Demokratîk lidar dixin û got, “Di bin navê Kombûnên Aştî û Civaka Demokratîk de partiya me hem li rojavayê Tirkiyeyê hem jî li Bakurê Kurdistanê nêzî 2 hezar civîn lidar xist. Civînên li Stenbolê jî di hefteya 3’yemîn de ne. Heta niha me li zêdeyî 40 deveran civînên gel pêk anîn. Em ê van civînan di dawiya meha Tîrmehê de temam bikin. Ji bo me civînên gel ne tenê fêhmkirina fikrekî ji aliyê gel ve ye. Em hewl didin bi hesasiyeteke mezin xeta siyasî ya partiya xwe bi gelê xwe, bi bingeha re diyar bikin. Em gavên xwe yên polîtîk bi vî rengî diavêjin. Lewma destpêkê aliyekî xwe yê bi vî rengî heye.
RÊXISTINIYA KU BERSIVÊ BIDE PÊVAJOYÊ
Aliyekî gelekî xweser ê vê demê heye ew jî rêxistiniya ku bersivê bide pêvajoyê ye. Em bi afirandina polîtîzasyoneke bi vî rengî berpirsyar in. Gelek lingên pêvajoyê hene ku hevdu temam dikin. Di nava van lingan de tişta ku di pêvajoya danûstandinan û zemîna diyalogê de pêk were bi nêzîkatiya bingeha me ya partiyê û civakê ve girêdayî ye ku wê vê pêvajoyê di kîjan astê de bipejirînin. Lewma ji fêhmkirina pêvajoyê wêdetir divê em li ser rol û mîsyona di vê pêvajoyê de bisekinin. Ji bo bingeha xwe ya partiyê û gel em civînên gel di vê çarçoveyê de dinirxînin. Dawiya dawî em analîza banga 27’ê Sibatê nakin. Ji wê demê û vir ve tecrûbeyek jî çêbû. Berpirsyarî û xeta me ya siyasî ye ku li gorî vê tecrûbeyê dema xwe ya bê diyar bikin. Li ser vê bingehê bêguman em nîqaşan dikin.”
Çinar Altan qala encamên ji van hevdîtinan bêne bidestxistin kir û got, “Ji pozîsyona heyî wêdetir em ê xwedî li pêvajoyê derkevin. Em hem amadekariyê ji vê re dikin hem jî ava dikin. Encama tê wergirtin jî, van civînan dikin rapor, em ê hemûyan bi berfirehî binirxînin. Tişta ku me heta niha dîtiye ew e ku hem ji aliyê mayindebûna aştiyeke wekhev û bi rûmet hem jî li nava partiya me ji aliyê pêvajoyê ve tevlîheviyeke fikrî nîne. Lê li aliyê din ji ber ku li aliyê hember gavên têrker nayê avêtin bêbaaweriyek heye. Em hewl didin ku bi nîqaşan bidin fêhmkirin ku pêvajo ji yên beriya niha cudatir e. Dikarim bi vî rengî şênber bikim; Ji ber ku dewletê têkildarî girtiyên siyasî û pêkanîna azadiya demokratîk heta niha gaveke şênber neavêtiye, di nava bingeh û gelê me de nearamiyek afirandiye. Em bi wê têgihiştinê nêzîk dibin ku em dikarin çi bikin ku bibin sedem ku dewlet gavê biavêje. Yekî ku bi gotina ‘ez ji vê pêvajoyê bawer nakim’ tê civîna gel, piştî nîqaşên me digihêje wê astê ku dibêje ‘Belê, ji bo pêkanîna vê pêvajoyê ez ê bi vê rolê rabim’. Dikarim bibêjim ku di her civînê de encameke bi vî rengî tê bidestxistin. Dewamkirina pêvajoyê bingeha esasî ye.”
AVAKIRINA XETA TÊKOŞÎNÊ
Çinar Altan destnîşan kir ku ew van civînan tenê weke karekî entelektuel nakin û got, “Gelekî girîng e ku ev yek bi perspektîfeke têkoşînê ve bê girêdan.” Altan diyar kir ku piştî wan rapor li ser van civînên xwe amade kir, wê xeta xwe ya têkoşînê diyar bikin û bi rola xwe rabin.
