Komeleya Ekolojiyê li dijî xebatên madenê yên li Zozanê Hesendînê ya navçeya Pasûr a Amedê çalakî li dar xist. Di çalakiyê de pankarta “Xwezaya me hebûna me ye, em dev jê bernadin” hat vekirin.
Berdevkê Komeleya Ekolojiyê Sabrî Kiliç diyar kir ku ji sala 2008’an ve gelê Pasûrê li dijî madanê axa xwe diparêze û wiha got: “Di salên 90’î de di encama politîkayên şer de gundên me hatin şewitandin û xelkên gundan koçberî bajaran bûn. Îro dîsa desthilatdar bi destê sermayeyê û madenê gund, xweza û jiyana me talan dike û dîsa dixwaze gelê me koçber bike. Ev madena ku tê xwestin li Zozanê Hesendînê bê avakirin dê tenê bandorê ne li Pasûrê dê bandorê li tevahiya herêmê bike. Dê ev maden gelî, çiya, newal û erdên me û çemê me ziwa bike. Li erdnigariya Kurdistanê bi rêya madenê, projeyên GES û HES’an tê xwestin bê talankirin.”
Kiliç destnîşan kir ku ev maden çêbibe dê goristan û ziyaretên li herêmê jî werin rûxandin û wiha domand: “Îro li erdnigariya Kurdistanê talana ekolojiyê heye. Îro behsa aştiye te kirin lê ev talan hê jî berdewam dike, ev şerm dê siberojê derkeve pêşiya me. Aştî dê azadiya xweza û ajalan jî pek bîne. Aştî neyê erdnigariya Kurdistanê aştiya civakî jî dê pek neyê. Em li vir bang komên sermeyadar û hevkarên wan dikin ku destê xwe ji axa me û qadên vekişînin. Zozanê Hesendînê ya me ye û dê ya me be.”
