Konferansa Yekemîn a Jinên Kurd li Rojava, bi dirûşma “Bi Pêşengiya Jinên Kurd Yekîtiya Netewî ya Kurd Misoger Dibe” li hola bexçeyê Azadî ya li bajarê Qamişlo, bi beşdariya nêzî 300 delegeyî pêk hat.
Di rûniştina duyemîn konferansê de wesîqeya “Konferansa Yekitiya Neteweyî ya Jinên Kurd ên Rojavayê Kurdistanê” ku ew ji prensîbên giştî yên konferansê ji aliyê endama Komîteya Amadekar û Berdevka Komîteya Têkilî û Tifaqên Demokratîk a Kongra Star Rîhan Temo ve hate xwendin.
Di wesîqeyê de xalên li ser “yekitî, nasname û çanda jinên Kurd, neteweya demokratîk, perwerde û jineolojî, hevjiyana azad, têkoşîna li dijî binpêkirina mafên jin, parastin û bergiriya destkeftiyên şoreşê, xweparastina rewa ya jinan, nixên şehîdên yekitiya neteweyî û nîştimanî, aboriya jinan û pêşxistina dîplomasiya jinan” hatin parvekirin.
Ev rûniştin ji hêla Seroka Şepêla Paşerojê ya Kurdistanê Narîn Metînî û Berdevka Kongra Star ve hate birêvebirin. Piştî xwendina wesîqeyê, delegeyan li ser hemû xalan nîqaş kirin.
Nûnera Partiya Çep a Kurd li Sûriyeyê Rojîn Mûsê anî ziman ku “Divê bê gotin ku jin Sûriyeyke nenavendî û demokratîk di bendeke taybet de dixwazin. Ji bo hebûna YPJ’ê jî bila nîqaş neyê kirin, YPJ`ê hebûna jinan misoger dike.”
Parêzer Sûad Xelo jî destnîşan kir ku pêwîstî bi avakirina yekitiya jinan li ser asta Kurdistanê jî heye û mînaka jinên Kurd li hemû Sûriyeyê bê belavkirin û got, “Parastina çand û ziman jî divê cihekî girîng di wesîqeyê de bigirin.”
Berdevka Akademiya Jineolojî Zihurbiyan Hisên pêşinyar kir ku bendeke taybet bi navê “sûcên şer ên ku dewleta Tirk a dagirker û çeteyên wê li dijî jinan dikin” li wesîqeyê bê zêdekirin.
Hevşardara Bajarê Qamişlo Bêrîvan Omer, pêşinyar kir ku bendekek ji bo parastina xwezayê hebe da ku jin karibin nasnameya xwe ya ekolojîk diyar bikin.
Endama Koordînasyona Kongra Star Elîf Hemo, diyar kir ku jinên Kurd stûna itîfaqa yekitiya neteweyî ne û anî ziman ku konferans wê bibe wesîleya yekitiya jinan.
Dayika Şehîd Hevrîn Xelef Sûad Mistefa, da zanîn ku divê xalên di belgeyê de hatiye diyarkirin pêk bên. Sûad Mistafa, bal kişand ser danezana destûrî ku ji aliyê desthilata Şamê ve hatiye îmzekirin û got, ku kes nikare jinan bi wê destûrê bixapîne û dirûşma”Jin, Jiyan , Azadî” her dem dê serbikeve.
Rewşenbîr Enahîta Sîno da zanîn ku ji bo ciwanan jî divê xaleke taybet bê danîn.
Rojnamevan Evîn Yûsif, pêşinyar kir ku ji bo pêkanîna xalên belgeyê pêwîstî bi avakirina komîteyên hiqûqî, perwerde û hwd. heye.
Endama Koordînasyona Kongra Star Şêraz Hemo, diyar kir ku heta niha li Rojavayê Kurdistanê ji aliyê jinan ve gavên balkêş hatine avêtin. Şêraz Hemo, destnîşan kir ku di xala duyemîn de ya nasname û çandê de, pêwîste çandên herêmên dagirkirî yên ku tên windakirin, werin bibîrxistin.
Piştî nîqaşan, axaftina bidawîkirina Konferansa Yekemîn a Jinên Kurd li Rojava ji hêla endama Partiya Demokrat a Kurd li Sûriyeyê (El-Partî) Stêr Qasim ve hate kirin.
Stêr Qasim, bal kişand ser Newroza 2025’an û got: “Newroza îsal cuda bû. Cejna gelê Kurd ji aliyê gelek pêkhateyên din ve hat pîrozkirin. Keda pêkhate û jinan ti carî têk naçe, piştî rûxandina rejîma Esed, bawerî di navbera wan û gelê li herêmên din ên Sûriyeyê mezin dibe. Konferans pêwîstiyek bû, her jinekê nêrîna xwe anî ziman. Gelê Kurd yek e. Divê tevgera siyasî ya Kurdî bibe yek. Ji bo kongreyeke neteweyî were lidarxistin em jinên Kurd amade ne.”
Piştî girtina deriyê nîqaşan, Rîhan Temo encamnameya Yekemîn Konferansa Jinên Kurd li Rojava xwend û konferans bi diruşmeya ‘Jin Jiyan Azadî’ bi dawî bû.
