Partiya Herêman a Demokratîk (DBP), Tevgera Jinên Azad (TJA) û Partiya Demokrasî û Wekheviyê ya Gelan (DEM Partî) pêşengiyê ji pîrozbahiyê re dikin.
Mîna li bajarên din li Wanê jî Newroz bi dirûşmên “Rêbertiya Azad Civaka Demokratîk” û “Civaka Demokratîk ji bo Azadiyê” pêk tê. Ji navenda bajêr, navçeyên derdorê bi deh hezaran kesî serê sibehê berê xwe dan qadan pîrozbahiyê.
Girseya gel li Qada Newrozê ya li quntarên Keleha Wanê li hev civiya û tim û tim dirûşma ‘Bijî Serok Apo’ diqîre.
Jin û ciwan bi kincên xwe yên rengî qad xemilandine.
Bernameya Newrozê bi deqeyeke rêzgirtinê ya ji bo bîranîna şehîdan destpê kir.
Komîteya Amadekar a Newrozê beşdar silav kir. Hevserokê Bajêr ê DEM Partiyê Veysî Dîlekçî got, “Ji bo em xwe bigihînin vê astê me têkoşîneke mezin meşand. Em ji vir radigihînin ku em piştgiriyeke mezin didin banga aştiYê ya Rêberê Gelê Kurd Birêz Ocalan. Heta ku aştî bê em ê têkoşînê dewam bikin.”
Hevseroka Bajêr a DBP’ê Gonul Ûzûnay jî got, “Gelê Wanê di tevahiya dîrokê de xwedî li têkoşîna xwe derket. Gelê Wanê wê xwedî li banga Birêz Ocalan derkeve. Gelê me wê erk û berpirsyariya xwe bi cih bîne. Ya herî girîng a ku niha divê bê kirin azadiya fîzîkî ya Birêz Ocalan e. Divê ev yek pêk were.”
Herikîna ber bi qada Newrozê dewam dike.
