Doktorên Sînornenas (MSF) 14’ê Tebaxa 2025’an daxuyaniyek dan û diyar kirin ku tenê hefteyekê herî kêm 40 kes ji ber kolerayê mirin.
Berpirsyarê Projeya Darfûrê ya MSF’ê Sylvain Penicaud ji AFP’ê re axivî û anî ziman ku nexweşê destpêkê destpêka meha Hezîranê li gundê Tabitê hate tespîtkirin.
Penicuad got, “Sûdanî li gel şer her wiha bi şewba herî giran a salên dawî ya kolerayê re rû bi rû ne” û diyar kir ku ji ber nebûna derfetên tenduristî, hijyen û ava paqij krîza kolerayê giran dibe.
FELAKETA MIROVÎ
Şewbê bandora herî giran li Tawila kiriye ku li bakurê Darfûrê ye. Li vê derê, li kampên demkî bi sed hezaran kes hene ku ji cih û warê xwe bûne. Li gorî Neteweyên Yekbûyî, Tawila niha ji nîv milyon mirovî re malovaniyê dike. Sivîlên ku ava paqij bi destê wan nakeve, li hemberî nexweşiyan hewl didin xwe bi rê û rêbazên xwe biparêzin.
GEF LI 640 HEZAR ZAROKÎ TÊ XWARIN KU DI BIN 5 SALÎ DE NE
Di nava du hefteyan de nexweşî belav bû û bîlanço giran bû. Meha derbasbûyî MSF’ê zêdeyî 1.500 kes derman kir. Li gorî Neteweyên Yekbûyî ji meha Nîsanê û vir ve li Tawilayê nêzî 300 zarok ji ber kolerayê nexweş ketin. UNICEF hişyariyê dide ku li eyaleta Darfûr a Bakur zêdeyî 640 hezar zarokên kêmî 5 salî bi gefa nexweşiyê re rû bi rû ne.
