Êrîşên qirkirinê yên li dijî Rojavayê Kurdistanê dewam dikin. Piştî ku herêma sînor a Şengalê ya bi Rojavayê Kurdistanê re ji aliyê çeteyên Colanî ve hate dagirkirin û DAÎŞ’iyên girtî derbasê Iraqê tên kirin, fikarên gel jî zêde bûne. Gelên Iraqê ji ber hatina çeteyên Colanî ya ser sînor, ne rehet in. Ji ber vê, artêşa Iraqê ji her demê zêdetir hêzên leşkerî kişandine ser sînorê navbera Rojava û Şengalê.
Şêniyên Serdeşta Çiyayê Şengalê têkildarî êrîşên li dijî Rojava û xeteriyên li ser Şengalê ji ANF’ê re axivîn û diyarkirin ku ew êrîşên li dijî Rojava weke êrîşên li dijî xwe dibînin.
Endama Rêveberiya TAJÊ Dayê Kinê Xidir di destpêka axaftina xwe de şehîdên Helebê û hemû şehîdên berxwedana Rojava bi bîr anî, got: ‘‘Em di şexsê Şehîd Denîz û Şehîd Ziyad de hemû şehîdên berxwedana Rojava bi bîr tînin. Ew mirin dan ber çavê xwe û gelê xwe parastin. Ji ber ku gelê me li Rojava zehmetiyê dikişîne, em gelek pê diêşin. Ev heyfa DAÎŞ’ê ji me dihilînin. Fikrê Rêber Apo DAÎŞ’ê şikand. Fikrê Serokatî li her derê li ber xwe dide.’’
‘ŞEHÎDÊN JI ROJAVA LI ŞEHÎDGEHA ŞENGALÊ NE’
Dayê Kinê îşaret bi hêz û dewletên li pişt êrîşên çeteyan kir û axaftina xwe wiha domand: ‘‘Timî vana dikin bela û her carê berdidin ser hinekan. Dibe sibe ew werin Şengalê jî. Kî Kurdî bipeyîve dikûjin û dibêjin bikûjin. Divê gelê me bizane Rojava nebe wê Şengal jî nebe. Eger Rojava nemîne wê Şengal jî nemîne. Dema fermanê yên xwedî fikrê Rêber Apo ji her derê hatin vir û parastin. Divê em ew mirovahiya li me hatiye kirin ji bîr nekin. Gelek şehîdên me yên ji Rojava niha di şehîdgeha Şengalê de hene. Divê herkes xwedî li Rojava derkeve, bes e ev zordarî û neheqî. Em dixwazin ev şer bê rawestandin.’’
‘FIKRÊ RÊBER APO LI TI CIHÎ TÊK NAÇE’
Dayê Kinê Xidir bi taybet bal kişand ser hêza fikrê Rêber Apo a di xurtbûna berxwedanê de û axaftina xwe wiha bi dawî kir: ‘‘Fikrê Rêber Apo ne li Bakur, ne li Başûr, ne li Rojava û ne jî li Rojhilat naşikê. Li Şengalê jî tu car ev fikir naşike û nakeve. Em ê her li berxwe bidin, her bijî Serokatî, her bijî Êzidî û fikrê Rêber Apo.’’
‘DIVÊ EM HEV BIGIRIN’
Hevserokê Şaredariya Gel a Serdeştê Ziyad Serdeşt jî îşaret bi girîngiya hevgirtina gelan a li dijî êrîşan kir û ev peyam da: ‘‘Em bi her awayî bi xelkê xwe yê Rojava re ne. Xelkê Rojava alîkarî ji me re şandibû. Em jî weke sazî û dezgehên Şengalê piştgirî didin Rojava. Hevgirtin û dest dayîna hev gelekî girîng e. Rojhilata Navîn îro, di rewşeke aloz de ye. Heman tişta ser Êzidiyan hat, niha li ser gelê me yê Rojava jî tê. Em piştgiriya wan dikin, serkeftinê ji şervanên şoreşê re dixwazin.’’
‘WÊ BERXWEDANA ROJAVA SERBIKEVE’
Endama TAJÊ dayê Qîmet Xwedêda jî da zanîn wê berxwedan bi ser bikeve û wiha pêde çû: ‘‘Em berxwedana gelê Rojava pîroz dikin, wê berxwedana wan bi ser bikeve. Silavê me ji hemû kesên di çeperên şer yên Rojava de ne heye. Bi taybet silav ji wan dayikên çek rakirine û keçên di çeperên pêş ên şer de şer dikin re. Em bejna xwe li ber ew şehîda ji avahiyê hate avêtin, ditewînin. Ew keç fedayî ne, ax û gelê xwe diparêzin, ji ti kesî natirsin. Tevî hemû zehmetiyan jî gelê me yê wir natirsin. Em ne şerxwaz in, aşitîxwaz in, lê şer were ber deriyê me, em ê berxwedanê jî bikin. Bi salan QSD çeteyên ku girtibû, di zîndanê de digirt, lê niha anîne Mûsilê. Çima anîne? Dibe dixwazin şerek li van herêman jî bidin destpêkirin. Xeteriyeke mezin li ser Şengalê jî heye. Ew DAÎŞ’iyên êrîşê me kiribûn di zîndanê de ne, ger derbikevin wê xeteriyê ji me re çêbikin. Em bi fikre Rêber Apo hatine perwerdekirin, em ê li berxwe bidin. Divê her kes ji bo Rojava kar bike. Divê em bi her awayekî hewl bidin vî şerî bidin rawestandin. Qanûn jî nemane, ger heba niha dê vî şerî bida sekinandin. Divê civaka Êzidî şiyar bibe, piştgiriya hêzên xwe bike. Hêvî dikim ev nexweşî hemû bibin xêr û xweşî.’’
Endamê Meclîsa Gel a Serdeştê Xalit Osman jî ji hemû Êzidiyan xwest piştgiriyê bidin Rojava û da zanîn ku mafê xelkê Rojava li ser Êzidiyan heye.
‘DIVÊ HEMÛ KURD PIŞTGIRIYA ROJAVA BIKIN!’
Hevserokê Meclîsa Gel a Serdeştê Mirad Biro jî da zanîn bi zanabûn di salvegera rizgarkirina Kobanî de êrîş dan destpêkirin û got: ‘‘Di vî şerî de jin û zarokan qetil dikin. Dîsa di salvegera rizgakirina Kobanê de êrîşê wir kirin. Jin û zarokan qetil dikin. Tişta herî kirêt çi be, wê bi mirovan dikin. Divê hemû Kurd piştgiriya Rojava bikin. Îro ev şer, şerê hebûn û nemana Kurda ye.’’
