Gaziyên Jin ên Federasyona Bakur û Rojhilatê Sûriyeyê têkildarî êrişên komên çete yên ser bi hikumeta veguhêz a Şamê ku piştgiriyê ji dewleta Tirk werdigirin ên li ser taxên Şêxmeqsûd û Eşrefiyê yên Helebê daxuyaniyek da.
Di destpêka daxuyaniyê de hate gotin, “Çeteyên girêdayî hikûmeta veguhêz bi alîkariya dewleta Tirk 6’ê Çileyê êrîşeke hovane li hember taxên Şêxmeqsûd û Eşrefiyê pêk anîn. Ev êrîşa hovane ya li ser esasê komkujî û qirkirina gelê Kurd bû bi awayê hemû nirxên mirovatiyê, exlaq û hiqûqê şer binpê dike hat meşandin.
Bi van êrîşan dihat armanckirin ku gelê me yê li wan taxan di qirkirinê re bê derbaskirin, demografiya bajêr bê guhertin û rûmeta gelê me bişikînin. Li her du taxan hêzên ewlekariyê bi hejmareke kêm li hember bi hezaran çeteyên hov berxwedaneke bêhempa û muezem nîşan dan. Wan berxwedêr û qehremanan pênc rojan bi îrade, hêvî û ezmeke mezin li ber xwe dan. Ev rojên welê bûn ku her kêliya wê berdêlî salekê ye.”
Daxuyaniyê bi vî rengî dewam kir:
“Dîrok careke din di şexsê lehengên fedaî fermandar Ziyad Heleb, şervanên rûmetê Hawar, Faraşîn, Denîz Dilbirîn û Rojbînan de nîşan da ku ti hêzeke dagirker û êrîşkar wê nikaribe vîna azad a bi felsefe û fikrên Rêber Apo bûye mîna pola bişikîne.
Ew çeteyên xwedî hişmendiyeke herî paşverû û hov in, êşkenceyê li cenazeyên berxwedêrên jin û xort dikin. Em wan kiryarên bêexlaq bi tundî şermezar û rûreş dikin. Li hember wan kiryaran em bang li her kesên xwedî rûmet dikin ku bikevin nav livûtevgerê. Li dijî wan pêkanînên li derveyî mirovatiyê pêwîst e her kesên xwedî wijdan dengê xwe bilind bikin û rabin ser piyan.
Em gelên me yên Bakur û Rojhilatê Sûriyeyê yên ji bo şehîdan, birîndaran û xelkê sivîl ên taxên Şêxmeqsûd û Eşrefiyê rabûn ser piyan jî bi rêzdarî silav dikin. Divê were zanîn ku em ê weke gel, şervan û gaziyên şer ti carî serê xwe ji dagirkeriyê, êrîşan û zilmê re netewînin. Heya fedaiyên me yên bi gotina, “Em rexnedayîna xwe didin gelê xwe” diçin ser mirinê hebin, em ê nekevin.
TIŞTÊN ÇETEYÊN HIKUMETA VEGUHÊZ Û DEWLETA TIRK LI HELEBÊ KIRIN SÛCÊ ŞER IN
Tiştên çeteyên hikûmeta veguhêz û dewleta Tirk li taxên Şêxmeqsûd û Eşrefiyê kirin sûcên şer in, tawanên li hember mirovatiyê ne. Divê tevahiya raya giştî ya mirovperwer û xwedî wijdan li hember wan sûcan bêdeng nemînin.
Em careke din gelê me yê Şêxmeqsûd û Eşrefiyê, hêzên xwe yên ewlekariyê, gaziyên xwe yên şer ên tevî hemû êş û birînên xwe jî di vê berxwedana dîrokî û bi rûmet de di nav refên berxwedanê de cih girtin, bi rêzdarî silav û hembêz dikin. Em bang li gelên xwe yên Bakur û Rojhilatê Sûriyeyê jî dikin ku bi dil û can xelkê me yê berxwedêr ê Şêxmeqsûd û Eşrefiyê pêşwazî bikin. Pêdiviyên wan ên jiyanî bi ruhekî Apoyî dabîn bikin.
EM Ê WELATEKÎ BI JIYANEKE XWIŞK Û BIRATIYÊ YA GELAN AVA BIKIN
Li ser vî esasî em tevahî şehîdên xwe yên berxwedana Şêxmeqsûd û Eşrefiyê bi bîr tînin, ji birîndaran re şîfaya xêrê dixwazin. Em ê bi ruhê berxwedanê yê hevrê Ziyad û Faraşînan dawî li zilmê, hovîtiyê û dagirkeriyê bînin. Ji sedî sed em ê welatekî hemû gel bi xwişk û biratî têde bijîn tevî hemû astengiyan ava bikin.”
