Xwendekara Zanîngeha Stenbolê ya Beşa Fîzîkê M. A. ku di firoşxaneya Nîşantaşiyê ya Viadelleros ku marka Îtalyan dixebitî, hem hat tacîzkirin û hem jî bi sûcdarkirinê ji kar hat derxistin. Hem jî ji ber ku ji bo protestokirina vê neheqiyê dema di merasîma derçûnê de dowîza ku balê dikişîne ser xala 6284 a pêşîlêgirtina tundiya mêr a li dijî jinan a Tirkiyeyê, di der barê wê de ji aliyê rêveberiya dibîstanê ve lêpirsîn hate destpêkirin. M.A der barê van neheqiyên li ser xwe de ji ANF’ê re axivî û wiha got: “Şerê min ne tenê bi tacîzkarekî yan jî bi fîrmayekî rezîl re ye, di heman demê de li dijî pergala ku me neçar hişt li gel xwendinê bixebitin û li cihên ku tên tacîzkirin bêdeng bimînin e.”
M.A diyar kir ku ew di 23’ê Gulana 2025’an de li firoşgeha Nîşantaşi ya Viadellerosê dest bi kar kiriye û ji destpêka kar ve jî rastî tacîzê hatiye
M.A diyar kir ku T.M ku di beşa depoyê ya firoşgehê de kar dike, wê bi hinceta “Were ez cihê xwarinê nîşanî te bidim” biriye beşa depoyê û li vê derê rastî tacîza gotinî û fîzîkî hatiye.
M.A diyar kir ku T.M piştre tacîzê xebatkareke din a jin jî kiriye û wiha got: “Min ev ji midûrê giştî û nûnerê markeyê re parve kir. Ji min re gotin tişta pêwîst wê were kirin lê nekirin.”
M.A diyar kir ku rêveberiya firoşgehê gotiye ku wê T.M ji kar derxin, lê wî şandine destûrê salê. M.A anî ziman ku ew vê rastiyê di cedwela vardiyayê de dîtiye û dema ku vê rewşê li ser Whatsappê ji midûrê re gotiye, roja din bi hinceta “performansa kêm” ji kar hatiye avêtin. M.A diyar kir ku ew ji bo nîşandayîna bertekê van bûyeran li ser hesaba xwe ya X’ê bi raya giştî re parve kiriye û wiha got: “Piştî vê rêveberiya firoşgehê îdia kir ku min bêbextiyê kiriye. Ev ne bes bû, min hînkir ku xebatkara din a rastî tacîzê hat jî ji kar avêtine.”
M.A diyar kir ku ew ji bo bertek nîşanî tacîz û neheqiya li ser xwe bide, di derçûna dibîstanê de balê kişandiye ser xala 6284’an û dowîza “Em fêrî parastina ji radyasyonê bûn, ne ji tacîzkaran” vekiriye. M.A destnîşan kir ku vê carê jî rêveberiya dibîstanê neheqî li wê kiriye û bi hinceta dowîzê lêpirsîn di derbarê wê de dane destpêkirin. M.A bi vî rengî carekî din nîşan da ku pratîka dijminahiya jinê çawa polîtîk e.
M.A ku gîliyê T.M û midûrê firoşgehê kir, wiha got: “Ew ê nikaribin min bêdeng bikin û bitirsînin. Ez ji ber vê hewl didim dengê xwe bidim bihîstin. Ne tenê ji bo xwe ji bo hemû jinên ku di kargehan de rastî tacîzê û mobîngê tên dengê xwe bilind dikim. Ji ber ku ev zîhniyet ji hesta me ya şermê hêzê digre. Divê em vê hêzê nedin van. Ji ber vê yekê şerê min ne tenê bi tacîzkarekî yan jî bi fîrmayekî rezîl re ye, di heman demê de li dijî pergala ku me neçar hişt li gel xwendinê bixebitin û li cihên ku tên tacîzkirin bêdeng bimînin e. Divê êdî tu jin bêdeng nemîne. Jixwe tacîzkar êdî ji darazê natirsin, lê bila herî kêm ji îfşabûnê bitirsin. Ji ber ku desthilatdarî di aliyê van de ye, karbidest di aliyê wan de ye, daraz di aliyê wan de ye. Divê ev neheqî û bêedaletiya li dijî jinan êdî were şikandin.”
