Li ser xeta sînorê hevpar ê di navbera Efxanîstan û Pakîstanê de, şeva şemiyê di navbera hêzên her du welatan de şerên dijwar qewimîn.
Her du aliyan jî ragihandin ku windahiyên giran hene, lê hejmarên di daxuyaniyan de gelekî ji hev cuda bûn.
Artêşa Pakîstanê roja Yekşemê daxuyaniyek da û diyar kir ku di dema parastina yekparçeyiya axa welat de 23 leşkerên wan jiyana xwe ji dest dane.
Di daxuyaniya artêşê de hate gotin: “Di vê êrîşê de, di dema parastina yekparçeyiya axa welatê me de 23 leşkerên me şehîd bûn. Di operasyonên me de zêdetirî 200 endamên Talîbanê û terorîstên girêdayî wan hatin bêbandorkirin.”
Ji aliyê din ve, rêveberiya Talîbanê ya li Efxanîstanê ragihand ku di “operasyona bersivdayînê” ya şeva borî de 58 leşkerên Pakîstanê hatin kuştin û nêzî 30 jî birîndar bûn.
Berdevkê hikûmeta Talîbanê Zabîhullah Mujahîd, roja yekşemê di daxuyaniya xwe ya çapemeniyê de got: “Me bersiv da binpêkirinên dubare yên artêşa Pakîstanê yên li ser axa Efxanîstanê û êrîşên wan ên esmanî. Di operasyonên me de 58 leşkerên Pakîstanê hatin kuştin, 9 şervanên Talîbanê jî jiyana xwe ji dest dan.”
Serokwezîrê Pakîstanê Şahbaz Şerîf jî Efxanîstan bi “provakasyonê” tawanbar kir û got: “Em ê tu carî tawîzê nadin, her êrîşê wê bersiveke xurt û bi bandor bibîne.”
Tê ragihandin ku aloziya di navbera her du welatan de piştî teqînên hefteya borî yên li Kabîl û başûrê rojhilatê Efxanîstanê zêde bûye. Rêveberiya Talîbanê Pakîstanê bi van êrîşan tawanbar dike, lê Îslamabad van angaştan red dike û Efxanîstanê bi “piştgiriya mîlîtanên Talîbana Pakîstanê (TTP)” tawanbar dike.
