Bi hezaran şêniyên bajarê Kobanê şervanên YPJ’ê Arîn Hemzê ku di 6’ê Sibatê de li Kobanê, Jiyan Amed û şervanê YPG’ê Hemê Tefşo (Ehmed Hecî) ku di 5’ê Çileya 2026’an li Qamişlo şehîd bûbûn, îro bi merasîmeke bi heybet spartin axê.
Her wiha şervanên YPJ’ê Arjîn Kobanê (Fadîle Elî) ku di 19’ê Çileyê li Reqayê, Jiyajîn Kobanê (Rênas Koro) ku di 18’ê Çileyê li Reqayê, şervanên YPG’ê Mûrad (Mûrad Elgedro) ku di 15’ê Sibata 2024’an de li Tirwazî, Hejar Til Xezal (Mistefa Kino) ku di 18’ê Çileyê de li Reqayê, şervanên Hêzên Ewlekariya Hundirîn Celal (Celan Hemî) ku 20’ê Çileyê li Sirînê, Rustem Kobanê, şervanên Hêzên Komandos Zagros Kaya (Ednan Mislim) ku 18’ê Çileyê li Reqayê û şervanê Hêzên Antîterorê Andok Elî (Ciwan Elî) ku 19’ê Çileyê li Reqayê şehîd bûbûn, hatin bibîranîn.
Merasîmê bi rêzgirtinê dest pê kir. Dûre berdevaka Însiyatîfa Azadiya Rêber Abdullah Ocalan a Kantona Firatê Eyşe Efendî sersaxî ji malbatên şehîdan re xwest û soza şopandina rêya şehîdan da.
Eyşe Efendî diyar kir ku divê her kes xwedî li kurdîtiya xwe derkeve û wiha got: “Em Kurd in, divê hemû Kurd destê xwe di destê hev kin û ji bo kurditiya xwe têkoşîn û berxwedanê bikin. Em ê bi hemû hêza xwe tê bikoşin û li ber xwe bidin heta kêliya serkeftinê. Em ê li pey xeta şehîdên xwe bin û doza şehîdên xwe bişopînin.”
Parêzer Ismet Îbrahîm diyar kir ku ew bi şehîdan serbilind in û got: “Va ye her kes behsa mafên Kurdan ên ku bi salan hatibû windakirin, dike. Ev yek jî bi saya şehîdên me bû, wan heta dawiyê têkoşîn kir û ji dijmin re got ‘em ê qebûl nekin hûn debasî axa me bibin û berxwedan jiyan e’. Bi rastî jî şehîdan ew dirûşm ji xwe re eses girt. Em ê jî her tim li pey xeta şehîdên xwe bin û doza wan bişopînin.”
Endamê Meclisa Leşkerî ya Kobanê Mihemed Oso diyar kir ku ew ê her tim li ser pêyan bin û xeta şehîdên xwe bişopînin û got: “Em bi şehîdên xwe serbilind in û em ê heta serkeftinê li ber xwe bidin û xewn û xeyalên şehîdên xwe pêk bînin.”
Ji fermandarên YPJ’ê Berfîn Kobanê sersaxî ji malbata şehîdan re xwest û diyar kir ku ew ê bi hemû hêza xwe tê bikoşin û şopdarên rêya şehîdên xwe bin û got: “Em ê mîrasa şehîdên xwe bişopînin û xewn û xeyalên wan pêk bînin. Em ê tu carî ji serî ji dijmin re netewînin.”
Piştre wesîqeya şehadetê hat xwendin û radestî malbata wan hate kirin.
Cenazeyên 3 şehîdan bi dirûşmên “Şehîd namirin” û tilîliyên dayîkan hatin veşartin.
