Ji aliyê Meclîsa Edaleta Civakî û Hêzên Ewlekariya Hundirîn ên bajarê Kobanê ve 66 kesên ku bi sûcên cuda hatibûn girtin, radestî komîteya ji şêxên eşîrên Ereb hate kirin ku ji bajarên weke Reqa, Dêrezor, Tebqa û Sirîn û gundên wan e. 66 kesên ji neteweya Ereb ên îro li bajarê Kobanê ber bi gundê Îtwêran ê girêdayî bajarê ve hatin şandin. Li wir piştî xwendina navên wan, ew radestî komîteya li wir hatin kirin.
Endamê Meclîsa Edaletê Îbrahîm Mislim diyar kir ku wan weke Rêveberiya Xweser karê xwe yê mirovî kirin û got, “Di rewşa dawî de biryar hat girtin ku ev kes bên berdan. Me jî tensîqa xwe bi şêxên eşîran re kir û me îro ew kes radestî wan kirin. Me ji doh de amadekariyên wê dikir. Şêxên eşîrên ji Dêre Zorê, Reqa, Tebqa û Sirînê hatin û me radestî wan kir. Em weke kesên eleqedar bi kar û xebatê xwe yê mirovî rabûn û ew radestî kes û xizmên wan kirin. Ji eşîrên weke Onê, Igêdat, Omêratan, Efafan û Begarî bûn. Îro jî danê sibehê me berê xwe da gundê Îtwêran û li wir me ew radestî wan kirin.”
Behrî Şêx Elî ku bi navê eşîra Onê ya bajarê Sinînê axivî, spasiya rêveberiya Kobanê kir û got, bi saya rêveberiyan îro ev kes diçin mala xwe. Her wiha gelekî siyasiya gelê Kobanê kir.
Qari Hesen El Şêx jî spasiya Meclîsa Edaleta Civakî kir û got, ew gelekî kêfxweş in bi gavên wiha, ji ber ku ew gelên Sûrî yek gel in.
Piştî daxuyaniyê jî ew kes derbas bûn û çûn gel xizmên xwe.
