Îro bi sedan şêniyên Kantona Firatê ji bo şehîdên xwe Endamên Hêza Komandosê Ehmed Salih (Xebat), Elî Mişo (Diyar Efrîn), Endamên Hêzên Sûriyeya Demokratîk (QSD) Hekîm Cezayêr (Şiyar Herekol) û Ferhad Ebdî (Ferhad Kobanê) ku di dîrokên cuda de li Bendava Tişrîn, Minbic û Qamişlo şehîd bibûn merasîmeke girseyî lidar xistin. Her wiha ji bo gerîlayê HPG’ê şehîd Îbrahîm Miho (Çiyager Dicle) ku di 22’yê Tîrmehê de li herêma Zapê şehîd bibû jî merasîma bîranînê lidar xist. Di merasîmê de şêniyên Kantona Firatê, malbatên şehîdan û nûnerên meclîsa leşkerî amade bûn.
‘EM Ê LI SER ŞOPA ŞEHÎDAN BIMEŞIN’
Di merasîma ku bi deqeyek rêzgirtin ji bo şehîdên şoreşê destpêkir de endama Meclîsa Malbatên Şehîdan a Kantona Firatê Dinya Mihemed axivî û bal kişand ser fedekariya şehîdan û wiha got: “Şehîdên me mîraseke bi rûmet ji me re hiştin. Em ê têkoşîna wan bidomînin û axa xwe biparêzin.”
Endamê Meclîsa Leşkerî ya Kantona Firatê Mihemed Oso, di axaftina xwe de peyama biryardariyê da û got, “Em ê weke hemû gelan li dijî yên ku dixwazin bi zîhniyeta Osmanî ji nû ve bikevin qadan, bibin yek. Gelê Kurd li ber serketinê ye, kes nikare vê asteng bike. Em ê heta dawiyê mîrateya şehîdan biparêzin.”
Birayê şehîd Şiyar Herekol Deham Cezayêr jî wiha axivî, “Bavê min şehîd bû, birayê min şehîd bû, îro birayekî min yê din jî şehîd bû. Kî li du wan bimîne ew ê li ser şopa wan bimeşe. Em serbilindin ku em rêya şehîdan berdewam dikin.”
Piştre jî wesîqeya şehîdan hatin xwendin û radestî malbatên wan hat kirin. Şehîd bi dirûşmeya ‘Şehîd Namirin’ hatin veşartin.
Piştî merasîmê şêniyên Kantona Firatê û malbatên şehîdan berê xwe dan konên sersaxiyê yên ji bo şehîdan hatine danîn.
