Li Şengalê hejmara 37’an a Kovara Dîcle derket

Kovara Dîcle ku 9 sale li Şengalê derdikeve, hejmara wê ya 37’an jî bi mijarên girîng û dewlemend derket.

Di kovarê de mijarên siyasî, aktûel, dîrokî, çandî, hunerî, jin û jineolojî, civak, tendûristî û hwd cih digirin.

Mehên Cotmeh û Mijdarê ku ji bo Êzidiyan jî û tevgera Azadiyê jî girînge, rojeveke germ pêktîne. Kovara Dîcle bi dosya, analîz û nivîsên taybet hejmara 37’an a Cotmeh-Mijdar derxistiye.

Kovarê bi taybet li ser girîngiya Xweseriya Şengalê û peywendiyên li gel hikûmeta federal a Iraqê disekine.

Edîtoryaya kovarê jî derbarê naveroka hejmara 37’an de wiha nivîsiye; “Weke tê zanîn demeke dirêj e têkiliyên di navbera dewleta Iraqê û Şengalê de bûne girêkên kor yên civakî û sîyasî ku divê bêne çareserkirin. Piştî fermana 03-08-2014’an gel bi îradeyeke xurt xwe birêxistin kir, birînên xwe pêça û heta astekî civaka xwe înşa kir lê ruxmî ewqas sal derbas bûn jî dewleta Iraqê bi awayeke fermî Xweserîya Şengalê qebûl nekirîye. Bi taybet qebûl nekirina jenosîda Êzidiyan, ne tenê nedîtîna gelê Êzîdî ye, di heman demê de tê wateya nasnekirina hafizeya dîroka gele me. Ev reftara Dewleta Iraqê, êrîşê li pêşeroja gel e ji ber wê jî bi şêwazeke stratejîk nêzîk dibe.

Îro pirsgirêka Şengalê ne tenê meseleyekî navxweyî ya Iraqê ye, di heman demê de girêdayî guhertina hêza serdestîya Rojhilata Navîn e. Lê heqîqet ew e ku heta îradeya civaka Êzîdî neyê naskirin û xwe birêvenebe, ne pirsgirêkên Şengalê çareser dibin ne jî dewleta Iraqê demokratîk dibe.

Ji ber van rastiyan, hejmara meya 37’an, bi taybet bal dikêşe ser têkîlîya di navbera Iraq û Şengalê de. Her wiha balê dikşîne ser polîtîkaya înkar a jenosîdê. Yek ji mijara me ya esasî ku em jê hêz digrin û dixwazin ev hêz hîn zêde berbiçav be jî hêza jina ku xwe birêxistin kiriye ku îro dibe hêza çareseriyê û komxebatan lidardixe. Ji ber ku em dizanin Heqîqet û Azadî tenê bi hêza rêxistinî mîsoger e.’’

Kovar bi nivîsên Kurdî (Latînî, Aramî) û Erebî digihije ber destê xwêneran. Bi taybet beşên ciwan ên Şengalê eleqeyeke baş nîşana kovarê didin. Kovara ku her carê 500 nûsxe tê çapkirin, dikarin ji pirtûkxaneya ‘Vejîn’ a Xanesorê bidest bixin.