Li gundewarên Dêrazorê ji ber şewitandina cihên safîkirina petrolê ji aliyê hikumeta demkî ve, şer derket.
Li bajarê Meyadîn ê rojhilatê Dêrazorê di êrîşa li dijî nuqteyeke leşkerî ya hêzên hikumeta demkî de, 3 endamên Wezareta Parastinê ya hikumetê hatin kuştin.
Li bajarokê Zîbanê yê Dêrazorê dema derketina girtiyekî ji girtîgehê gule hatin teqandin û top hatin avêtin, ji ber vê yekê aloziya ewlehiyê derket.
Li ser rêya Reqa-Tebqayê êrîşî dewriyeyeke hêzên ewlekariya giştî yên hikumeta demkî hat kirin. Her wiha li dijî benda kontrolê ya Sebahiya ya têketina rojavayê bajarê Reqayê êrîş pêk hat, di encamê de 4 endamên hêzên ewlekariyê yên hikumetê hatin kuştin.
Li nêzî bendava bajarokê Mensûra yê Reqayê endamekî hêzên ewlekariya giştî yên hikumetê kuştî hat dîtin.
Li bajarokê Îhtîmîlat ê Ezazê di encama pevçûna di navbera du malbatan de kesek hat kuştin.
Li taxa Ekrema ya bajarê Humsê mamosteyek bi navê Îman Metyanûs Cerûs (47) hat gulebarankirin û di cih de jiyana xwe ji dest da.
Li taxa Cura ya kampa Ceremana ya gundewarên Şamê ji ber lîstina bi bombeyeke destan di malekê de, ciwanek hat kuştin û yek bi giranî birîndar bû.
Hêzên Parêzvanên Nîştimanî yên Siwêdayê ragihand ku komên hikumeta demkî ya Sûriyeyê li gundên Mecelê malên sivîlan topbaran kirin.
Li bajarê Serêkaniyê jî di pevçûnên malbatî de ciwanek hat kuştin û yek jî birîndar bû.
Li gundewarên bakurê Helebê ji ber nakokiyên li ser pereyan ciwanek ji aliyê pismanê xwe ve hat kuştin.
Li gundê Xerra yê çiyayê Kezwan ê li başûrê rojavayê Hesekê ji ber teqîna mayinekê ya bermahiyên şer 2 ciwan birîndar bûn.
