Tevgera Jinên Azad (TJA), ji bo ji endamên Fermandariya Biryargeha Navendî ya YJA Starê Nazli Taşpinar (Emîne Erciyes), Leyla Acar (Zîn Zagros) û Şehrîcan Akin (Ekîn Amara) li Wanê çalakiya bîranînê li dar xist. Bîranîn li avahiya DEM Partî ya bajêr hate lidarxistin, pankarta wêneyên jinan hate daleqandin, find hatin pêxistin û kulîlk danîn ser masê.
Rêveberên DEM Partî, DBP, MEDBYA-DER, TUHAY-DER, Dayikên Aştiyê, endamên Meclîsa Ciwanan a DEM Partiyê û gelek kes tevlî çalakiyê bûn.
Piştî deqîqeyek rêzgirtinê, Hevseroka MEBYA-DER’ê Hanim Kaya axivî û wiha got: “Bîranîna sê hevalên me ji bo me barekî giran e. Têkoşîna ku di xeta jinê de destpê kir, îro bi keda wan pêş ket. Keda hevala Emîne pîroz e, ji ber ku Kurd bi têkoşîna xwe ne tenê ji bo mafên xwe, ji bo hemû gelên bindest li ber xwe didin.”
Hevseroka DEM Partî ya Wanê Gulşen Kurt jî wiha got: “Gelê Kurd bi salan in ji bo hebûna xwe têkoşînekî mezin didin. Eger îro felsefeya ‘Jin, Jiyan, Azadî’ li hemû cîhanê deng vedide, ev bi saya têkoşîna wan e.”
MÊRDÎN
Heman roj li Mêrdînê jî bi pêşentiya TJA’yê çalakiya bîranînê hate lidarxistin. Bîranîn li pêşiya rêxistina DEM Partî ya bajêr hate lidarxistin û parlementer Salîha Aydenîz, Kamûran Tanhan, Bêrîtan Guneş Altin, endamên Meclîsa Dayikên Aştiyê û gelek kes tevlî bîranînê bûn.
Di bîranînê de pankarta “Jinên egîd yên çiyayên Zagros, Botan û Erciyesê” hate vekirin û bîranîn bi deqîqeyek rêzgirtinê destpê kir. Dema ku jinan sirûda Çerxa Şoreşê dixwendin, gelek caran dirûşmeyên “Şehîd namirin”, “Şehîd rûmeta me ne” û “Jin jiyan azadî” hatin berzkirin.
Berdevka TJA’yê ya Mêrdînê Hatîce Oncur wiha got: “Her yek ji wan bû çemek û herikîn têkoşîna azadiya Kurdistanê. Xeta wan rê nîşanî me dide. Her şehîdek felsefa me ya jiyanê ye.”
Parlementer Bêrîtan Guneş jî bertek nîşanî astengiyêm walîtiyê yên li hemberî bîranînê nîşan da û wiha got: “Em sê jinên azad bi rêzdarî bi bîr tînin. Heta ku em komara demokratîk ava bikin, gavekî jî paşde neavêjin. Em ê heta dawî xwedî li têkoşîna şehîdan derbikevin. Emîne Erciyes Tirk bû, lê dil dabû têkoşîna azadiyê. Em ji bo xwişk-biratiya gelan têdikoşin. Em ê têkoşîna wan bi neteweya demokratîk û civaka demokratîk re tacîdar bikin.”
Piştî axaftinan jinan bi dirûşmeyên “Jin jiyan azadî” ve “Heval Emine rûmeta me ye” heta Parka Karayolari meşiyan.
