Mîhrîcana Huner û Wêjeyê ya Jinê ya 10’emîn wê di 17’ê Nîsanê de li bajarê Qamişloyê bi dirûşma ‘Bi deng û rengê jinê ber bi hunera azad ve’ bê lidarxistin. Mîhrîcana îsal ku ji aliyê platformên jinan ve bi wesîleya 8’ê Adarê weke çalakiyekê hate destpêkirin, ji ber şert û mercên ewlekariyê yên îsal nekarî meha Adarê bê lidarxistin. Komîteya Amadekar a Mîhrîcanê dema mîhrîcanê guhert û 17’ê Nîsanê diyar kir. Mîhrîcana îsal wê bi rengekî cuda bê lidarxistin. Mîhrîcana ku her sal li Navenda Çand û Hunerê ya Mihemed Şêxo dihate lidarxistin, yekemcar wê li Parka Azadî ya Qamişloyê pêk were. Mîhrîcan wê 17’ê Nîsanê saet di 17:00 de destpê bike û 19’ê Nîsanê bi dawî bibe.
Mîhrîcana Huner û Wêjeyê ya Jinê xwedî du komîteyên nirxandinê ye. Yek ji wan beşa çîrok û helbestên bi Kurdî û Erebî dinirxîne. Ya din jî hunera wêneyan dinirxîne. 50 jinên ku karên destan dikin beşdarî mîhrîcanê dibin û ev kar wê ji aliyê komîteya hunerê ve bê nirxandin. Di dawiya mîhrîcanê de wê xelat ji sê jinên serketî re bê dayin. Hevseroka Komîteya Çandê ya Kantona Cizîrê û Endama Komîteya Amadekar a Mîhrîcana Huner û Wêjeyê ya Jinê Firyal Çolî li ser armanca mîhrîcanê ji ajansa me re axivî.
Firyal Çolî anî ziman ku weke komîteya amadekar ji 1’ê Nîsanê û vir ve ew dixebitin û got, “Di nava dema mîhrîcanê de wê gelek çalakî bêne lidarxistin. Hin ji hunermendên me yên naskirî wê beşdarî mîhrîcanê bibin. Di heman demê de gelek komên huner û wêjeyê jî wê tevlî bibin. Ev mîhrîcan ji bo jinan hemûyan firsendek e. Her kes wê karibe huner û pîşeyê xwe pêşkêşî civakê bike. Gelek jinên li derveyî Rojava dixwazin bibîn bê ev mîhrîcan çawa bi destê jinê tê birêxistinkirin û dixwazin tevlî bibin. Bi rêya van çalakiyan em bala jinan dikişînin. Armanca esasî jî ew e ku jin her sal hîn bêhtir xwe bi pêş ve bibin û asta xwe ya serketinê bilind bikin. Her jineke ku beşdarî mîhrîcanê dibin xwedî kedeke mezin e. Di heman demê de wê spasnameyek pêşkêşî her beşdareke mîhrîncanê bê kirin. Em çalakiyên bi vî rengî lidar dixin, ji bo jin her tim bi hev re bêne bîranîn. Divê jin xwe nas bike û her roj xwe bi pêş ve bibe.”
ARMANC EW E KU MÎHRÎCAN LI BAJARÊN DIN JÎ BÊ LIDARXISTIN
Firyal Çolî anî ziman ku ew dixwazin vê mîhrîcanê li gelek bajarên Bakur û Rojhilatê Sûriyeyê lidar bixin û di dawiya axaftina xwe de got, “Mîhrîcana Huner û Wêjeyê ya Jinê ku îsal cara 10’emîn tê lidarxistin, wê li bajarê Qamişloyê pêk were. Lê belê ji gelek deveran jin dixwazin beşdarî mîhrîcanê bibin. Di dema bê de em ê hewl bidin vê mîhrîcanê li Kantona Firatê jî lidar bixin. Herî dawî dixwazim bibêjim ku em ê vê têkoşînê dewam bikin ku jinên li Sûriyeyê karibin ji bo hemû jinên cîhanê bibin sembol.”
Bernameya Mîhrîcanan Huner û Wêjeyê ya Jinê bi vî rengî ye:
Roja destpêkê (17’ê Nîsanê):
* Hevseroka Meclîsa Gelan a Bakur û Rojhilatê Suriyeyê Sîham Qeryo wê axaftina destpêkê bike.
* Bi navê Komîteya Amadekar a Mîhrîcanê, Hevseroka Desteya Çandê ya Kantona Cizîrê Firyal Çolî wê biaxive.
* Piştî axaftinan wê sînevîzyonek a ji aliyê Komîteya Amadekar ve ji bo beşdarên mîhrîcanê hatiye amadekirin bê nîşandan û peyam bêne xwendin.
* Koma muzîkê ya Stêra Zêrîn wê hunera xwe pêşkêş bike.
* Ayfir Yildiztan wê helbesta bi Kurdî bixwîne.
* Koma Ermen Anuş Abîdan wê derkeve ser dikê.
Roja 2’yemîn (18’ê Nîsanê):
* Yasmîn Esker a ji bajarê Reqayê wê stranên xwe yên bi Erebî bibêje.
* Helbestvan Meryem Temir wê bi helbestekê tevlî mîhrîcanê bibe.
* Piştî helbest û stranan Koma Şano ya Hîlala Zêrîn wê şanoyekê pêşkêş bike.
* Koma Govendê ya Koma Dîlan wê hunera xwe pêşkêş bike.
* Fîlmê bi navê Xewa Mirinê wê bê nîşandan.
Roja 3’yemîn (19’ê Nîsanê):
* Hunermend Sumeyye Mihemed wê derkeve ser dikê.
* Sînevîzyon wê bê nîşandan.
* Di dawiya mîhrîcanê de wê spasname pêşkêşî hemû beşdaran bê kirin û xelat ji sê jinên serketî re bê dayin.
