Serokê Herêma Kurdistanê Nêçirvan Barzanî têkildarî peymana navbera QSD û Hikumeta Şamê ya Demkî de daxuyaniyek weşand.
Nêçirvan Barzanî anî ziman ku ew piştgiriyeke tam didin peymanê û ev yek ji bo çareseriya krîza li Sûriyeyê gelekî girîng e. Nêçirvan Barzanî got, “Em piştgiriyê didin wê peymanê ku şerê navbera Hikumeta Sûriyeyê û Hêzên Sûriyeya Demokratîk (QSD) disekinîne, saziyên leşkerî û îdarî entegre dike, mafên perwerde û sivîl ên gelê Kurd misoger dike û vegera mirovên ji cih û warê xwe bûne ji xwe re dike armanc. Ev peyman ji bo çareseriya aştiyane û bidawîkirina rageşiyê gaveke girîng û rast e. Weke ku me timî destnîşan kir; rêbazên siyasî, fêhmkirina hev û diyalog mifteya yekane ya çareseriya mayinde ye ku xizmetê ji berjewendiyên her kesî re bike.”
PÊWÎSTÎ BI GARANTIYA DESTÛRA BINGEHÎN HEYE
Serokê Herêma Kurdistanê got, “Ev lihevkirin ji bo jiyaneke bi hev re ya gelan, aştiya civakî û aramiyê zemîneke xurt pêşkêş dike” û bi vî rengî dewam kir: “Hêviya me ew e ku ev gav ji bo avakirina Sûriyeyeke yekbûyî, garantîkirina mafên gelê Kurd û hemû pêkhateyan di destûra bingehîn de û pêkanîna aramiya li tevahiya herêmê bibe wesîle.”
