Di 15’ê Gulanê de Cejna Zimanê Kurdî, ku di atmosferek li Tirkiyeyê çareseriya pirsgirêka Kurd tê nîqaşkirin de tê pîrozkirin û daxwaza statuya zimanê Kurdî careke din derket pêş. Saziyên Kurdî di daxuyaniyên xwe de, destnîşan kirin ku çareseriya vê pirsgirêkê tenê bi bidawîbûna polîtîkayên înkarê mimkun e. Parlamenterên DEM Partiyê jî gelek pêşniyarname pêşkêşî Meclîsê kirin da ku astengiyên li pêşiya zimanê Kurdî werin rakirin.
Parlamentera DEM Partiyê ya Şirnexê Newroz Uysal Aslan, ji ajansa me ANF’ê re axivî û diyar kir ku zimanê Kurdî ne tenê zimanekî danûstandinê ye û got, “Statuya ku zimanê gelê Kurd dê bidest bixe dê rewşa pêvajoyê jî diyar bike.”
’15’Ê GULANÊ SEMBOLA TÊKOŞÎNA LI DIJÎ ÎNKARÊ YE’
Newroz Aslan, anî ziman ku Cejna Zimanê Kurdî ne tenê rojeke pîrozbahiyê ye, di heman demê de sembola nasname û têkoşîna mafên gelê Kurd e. Newroz Aslan, diyar kir ku pirsgirêka ziman yek ji mijarên bingehîn ên pêvajoya çareseriyê ye û got, “Perwerdehiya bi zimanê dayikê mafekî mirovî yê gerdûnî ye. Yek ji bendewariya gel a bingehîn ev e.”
‘ME GELEK PÊŞNIYARNAME PÊŞKÊŞ KIRIN’
Newroz Aslan, da zanîn ku wan gelek pêşniyarname pêşkêşî meclîsê kirine da ku astengiyên li pêşiya zimanê Kurdî ji holê bên rakirin û behsa astengiyên li ser weşanên Kurdî, muzîk, perwerde û xizmetên giştî kir. Newroz Aslan, her wiha got ku wan ji bo misogerkirina bikaranîna Kurdî di pêvajoyên lêpirsîn û darizandinê de jî pêşnûmeqanûn pêşkêş kirine.
‘SEDSALEKE QEDEXE Û BERXWEDAN’
Newroz Aslan, diyar kir ku pirsgirêka Kurd li ser înkarkirina Kurdan û zimanê Kurdî hatiye avakirin û got ku tevî zêdetirî sedsalek polîtîkayên qedexe û asîmîlasyonê jî, gelê Kurd têkoşîna xwe ya ji bo zimanê xwe didomîne. Newroz Uysal got, “Em ji qonaxa ku bi Kurdî axaftin dibû sedema cezayê hatine roja îro û daxwaza statuyê dikin.”
‘NE QENCÎ YE, MAFEK BINGEHÎN E’
Newroz Aslan, anî ziman ku gavên sînorkirî yên ku AKP’ê têkildarê ziman avêtine, wekî qenciyek tê nîşandan û got ku TRT Kurdî û dersên bijartî yên Kurdî li dibistanan mafên bingehîn ên gel in. Newroz Aslan, diyar kir ku Kurdî hîn jî di tomarên Meclîsê de tê sansûrkirin û got ku nêzîkatiya înkarker a li hember zimanê Kurdî berdewam dike.
‘AKP LI GORÎ BERJEWENDIYÊN XWE NÊZÎ KURDÎ DIBE’
Parlamentera DEM Partiyê Newroz Uysal Aslan, destnîşan kir ku siyaseta AKP’ê ya li hember zimanê Kurdî li gorî berjewendiyên xwe ye û got ji aliyek ve TRT Kurdî tê vekirin û ji aliyê din ve jî dezgehên medyayê yên bi zimanê Kurdî weşanê dikin, konser û çalakiyên çandî dikin, qedexe dike. Newroz Aslan got, “Têrê nake ku mirov Kurdî wekî zimanekî ji bo bikaranîna rojane bibîne. Têgihîştinek heye ku hewl dide vî zimanê kevnar qels bike.”
‘BÊCEZATÎ SIYASETA DEWLETÊ NÎŞAN DIKE’
Newroz Aslan, diyar kir ku siyaseta bêcezatiyê ji bo kesên ku ji ber axaftina bi Kurdî an guhdarîkirina muzîka Kurdî rastî êrîşan tên berdewam dike û got ku ev siyaseta dewletê ye. Newroz Aslan got, “Heta ku hûn zimanê Kurdî nas nekin, hûn Kurdan bê statu dihêlin.”
‘RÊYA AŞTIYÊ BI NASKIRINA ZIMANÊ DAYIKÊ RE PÊKAN E’
Newroz Aslan, got ku aştiyeke rastîn bi Kurdan re tenê bi naskirina zimanê wan ê dayikê mimkun e. Newroz Aslan, anî ziman ku divê bendên Destûra Bingehîn ên ku perwerdehiya bi zimanê dayikê asteng dikin werin guhertin û xwest ku zimanê Kurdî di perwerdehiyê, qada giştî û saziyên fermî de jî were misogerkirin.
