Rêber Apo, bi taybetî jî li Kurdistanê ji bo jinan jiyaneke nû afirand. Nasnameyeke jinan a xwedî îrade, bawerî, wêrek û azad pêşkêşî hemû jinan kir. Li gel vê yekê hem tola jinan stand hem jî dilsoziya xwe ya ji jinan re nîşanî hemû cîhanê da. Hevrêtiya Sarayan kir, li gel Zîlanan xeta azadiya jinan diyar kir û li gel Bêrîtanan artêşbûna jinan YJA Star ava kir. Ji hemû neteweyan, olan û mezhebanbi hezaran jin anîn ba hev. Navê her lehengekê, li zarokên nû ji dayîk bûne hate kirin. Hêlîn Kobanê jî bi navê xwe yê di nava malbatê de Şemsa Adil Feyyad, li ser şopa lehengên Kurdistanê meşiya, ji jinên Ereb re pêşengtî kir û navê xwe li dîroka berxwedana Tevgera Azadiyê da nivîsandin.
Hêlîn Kobanê bi eslê xwe ji bajarê Minbicê ye û Ereb e. Dema ku êrîşên çeteyên DAÎŞ’ê yên li ser Rojava zêde bûn, malbata wê jî bi van êrîşan re rû bi rû dimîne û ji aliyê dijmin ve tê qetilkirin. Ciwanên Kurd ên ku li hemberî çeteyên DAÎŞ’ê berxwedaneke mezin nîşan didin, bala heval Hêlînê dikşînin. Jinên ciwan ên ku di destê wan de çek û xaka xwe diparêzin, gelekî bandorê li Hêlîn Kobanê dikin. Stûxwarkirina li hemberî dagirkeriyê, nebihîstina dengên zarok û dayikên dilbisoj ji hestên heval Hêlînê re giran tên û vê yekê qebûl nake. Ji ber vê yekê di destpêkê de perwerdeyên leşkerî û îdeolojîk dibîne. Dema ku xwe di warê leşkerî de pêş dixe, çeka xwe radike û beşdarî operasyonên li dijî çeteyên DAÎŞ’ê dibe. Çend çeteyan ceza dike ew qasî pê şanaz û serbilind dibe. Ev serfirazî, ji wê re rê li ber rêyeke nû, armancên nû û jiyaneke nû vedike.
Dikeve rê, tavehîvê dike hevrêya xwe û gav bi gav ber bi jiyana gerîlayan ve dimeşe. Dibe şahida lehengiya gerîlayên ku her roj li hemberî çekên qedexekirî li ber xwe didin, bi kenê gerîlayan kêfxweş dibe û li gel meşa wan ber bi jiyaneke birûmet ve diçe.
Têkoşîna gerîlayan a li çiyayên azad, ji bo wê rê li ber jiyaneke nû vedike û girêdayî vê yekê di sala 2023’yan de tevlî nava refên gerîlayan dibe. Dîtina çiyayên Kurdistanê Hêlîn Kobanê gelekî kelecan dike. Bedewiya çiya, av û kaniyan di dilê wê de weke bahozekê mezin dibin. Meşên ku li serê çiyayan, gir û şiverêyan dike, ji bo wê dibin îfadeya meşa ber bi azadiyê ve. Xwiha li ser eniya wê, westabûn û bêxewî ji bo heval Hêlînê biryardariya jiyaneke birûmet in.
TÊKILIYÊN HEVRÊTIYÊ JI BO WÊ PÎVANEKE JÊNEGER BÛ
Di nava refên YJA Starê de li ser xeta neteweya demokratîk a Rêber Apo diyarî hemû gelan kiriye, têdikoşe. Heval Hêlîn bedewiya cudahiyan ditîbû; ji ber vê yekê xwe li ser vê fikrê diafirîne û berê jiyana xwe bi vî awayî diyar dike. Heval Hêlînê berê xwe dabû heqîqetê. Têkliyên hevrêtiyê ji bo wê pîvaneke jêneger bû. Hebûn û hişmendiya xwe li gel hebûna hevrêyên xwe watedar dikir. Heval Hêlîn, di her kenên hevrêyên xwe de wateya jiyaneke nû dibîne, hevrêtî li gel hezê ji nû ve mezin û bedewtir dikir. Hemû hevrêyên wê yên di encama çekên qedexekirî de şehîd dibin, vê yekê li cem heval Hêlînê hestên tolhildanê, hêrs û nefreta li dijî dijmin mezintir dikir. Berxwedana hevrêyên wê ji bo wê vediguherî dibistaneke têkoşînê. Qîrîna Baz, kenê Helbestê weke xeyalekê diketin nava şevên wê.
Li gel dîmenên wan hevrêyan berpirsiyariya xwe ya tolhildanê li wijdana xwe dipîrsî. Bi gotina ‘Em dereng man, em çend dereng bimînin dîrok wê hesabê ji me bipirse’ barê şoreşê digirt ser milên xwe.
Ji bo heval Hêlînê jiyana hêsan, jiyaneke wisa ye ku divê mirov nejî. Wê jî biryar da ku di rêça hevrêyên xwe yên fedaî yên weke Şehîd Sara û Rûken de biçe. Ji bo ku ji têkoşîna li Rojavayê Zapê tê meşandin bêpar nemîne, pêşniyar kir ku derbasî qada şer bibe. Hêlîn Kobanê ya ku weke gerîlayeke YJA Starê di nava berxwedana Zapê de cihê xwe girt, bi pêngavên xwe dijmin matmayî hişt. Tevî ku dûrî hevrêyên xwe û di bin dorpêçê de bû jî li gel hêrsa tolhildanê ya ku bi salan di dilê wê de kom bûbû, derbeyên giran li dijmin dixe.
Ev şervana fedaî û wêrek, şehadeta hevrêyên xwe li gel mezinahiya jiyaneke nû pêşwazî dike, lê belê bi tu awayî qebûl nake ku dijmin cenazeyên wan desteser bike. Heval Hêlîn dema ku dixwaze cenazeyên hevrêyên xwe bistîne li gel Lêgerîn Canfeda di 20’ê Mijdara 2024’an de tevlî karwanê şehîdan dibe. Hêlîn Kobanê weke jineke berxwedêr hemû kêliyên xwe li gel têkoşînê derbas dike. Çimkî dizanî ya esas ew e ku ji milyonan re ala azadiyê bilind bike; wê destûrê nedin tu hêzan ku wê alê daxînin, wê li ber xwe bidin û li gel Rêberê xwe bigihîjin jiyanên azad.
